Hepisîyo Kurd o nêweş Abdulkadir Kudayî o ke seba nêweşîyanê xo nêameyne veradayîş, hepisxane de merd.
Abdulkadir Kudayî hepisxaneyê Metrîsî de panc serrî bî ke nêşîyêne nêweşxane.
Abdulkadir Kuday nêweşê ALSî bî, êdî bi rehetî nêeşkêne qisey bikero û keyeyê ey bi ters û şubhe, bêçare û destgirêdaye paweyê veradayişê ey bi.
Birayê Abdulkadir Kudayî, Salîh Kudayî, ewro xebera xirabine daye û va ke birayê ey hepisxane de merdo.
Salîh Kudayî da zanayiş ke ê do cenazeyê birayê xo berê qezaya Qoserî ya Mêrdînî.
Abdulkadir Kudayo ke Mêrdînij o, serra 2014 de bi îdîaya ke beşdarê çalakîyanê Kobanî bîyo amebi tepiştiş û cezayê heta-hetayî ci rê ameybî birnayiş.
Kuday hepisxane de nêweş kewt û nêweşxane de teşxîsêko xelet ci rê ame kerdiş û peynî de zî % 98 astengdar bi.
Demêko derg tedawîya ey nêameye kerdiş.
Kuday bi sereyê xo nêeşkêne çîyêk bikero û o yewna hepisîyo astengdar reyde ameyêne tepiştiş.
1564 hepisîyê nêweşî estê
Goreyê melumatanê ke Komelaya Heqanê Merdiman (ÎHD) vila kerdê, Tirkîya de 1564 hepisîyê nêweşî estê.
Înan ra rewşa 590 kesan giran a û rewşa înan seba hepisxaneyan nêmunasib a.
Reyna goreyê ÎHDyî, di serran de 94 hepisîyê nêweşî hepisxaneyan de merdê.
