Hûmara 80. ya Kovara Vateyî weşanîyaye.

Kovara Vateyî ke bi safî kirmanckî (Zazakî) hadre bena û her hîrê aşman ra yew vejîyena, Kovara Vateyî bi hûmara xo ya 80. vejîya verê wendoxanê xo. 

Na hûmara kovare zî sey hûmaranê verênan dekerde ya û nuşteyê muhînî tede ca gênê. 

Weşanxaneyê Vateyî ke bi taybetî Kirmanckî (Zazakî) ser o xebetîyeno û heta nika bi seyan kitabî û 80 hûmarê Kovara Vateyî çap kerdî, humara 80. ya Kovara Vateyî weşana.

Keyepelê Vateyî de beşê "wendoxan rê" ameyo parekerdiş û ma şima dir parê kenê. Beşê "wendoxan rê" yê Kovara Vateyî cêr de yo. 

WENDOXAN RÊ

Wendoxê delalî,

Hûmara yewine ya kovara Vateyî hamnanê 1997î de neşr bî. Ma nika hamnanê 2024î de yê û hûmara 80. ya kovara Vateyî destê şima de ya. Yanî kovara Vateyî kutekut 27 serrî yo ke weşanê xo bêmabên domnena. Çi heyf ke weşangerîya kurdan de weşanê wina emrdergî zaf kêm ê. Kovara Vateyî înan ra yew a. Bêguman keda gelek kesan na emrdergîya kovare de est a. Verê verkan ma wendox û nuştoxan rê sipas kenê. Labelê gelek hetkar û sînayoxê kovara ma zî est ê;  keyeyê înan hemîne awan bo ke ê wayîrîya kovara xo kenê.

Wendoxê delalî,

Semedê serrgêra 27. ya kovare ra, ma wazenê biney behsê nuştoxanê kovare zî bikê: Nê 80 hûmaranê kovare de nuşteyê 314 nuştoxan ca gênê. Nê nuştoxan ra 40 hebî cinî yê. Nisbetê nuşteyanê tayê nuştoxanê ma zî wina yo: Nê 80 hûmaranê kovare de, 99 kesan 2 ra heta 5 hûmaran de, 31 kesan 5 ra heta 10 hûmaran de, 22 kesan 10 ra  heta 20 hûmaran de, 9 kesan zî 20 yan zî hîna zaf hûmaran de nuşto. Eserê 40 nuştoxan zî ameyê açarnayene.

Wendoxê delalî,

Nuştox û weşanger Deniz Gunduzî serra 2003 de Weşanxaneyê Vateyî awan kerd. Weşanxaneyî heta nika 138 kitabî weşanay, înan ra 111 kitabî kirmanckî yê. Nê çend serranê peyênan de weşanxaneyî zaf tay kitabî neşr kerdê. La payîzê 2023 ra pey Weşanxaneyê Vateyî, new aşman de 17 kitabî weşanay. Nê kitaban ra 16 hebî kirmanckî yê. Înan ra şeş kitabê şîîran, hîrê hebî bîyografî, hîrê hebî tezî, yew nuşteyê gêrayîşî, yew roman, yew hîkaye, yew arêkerdişê folklorî û yew zî kitabê rastnuştişî yo. Demêk hende kilmî de neşrkerdişê 17 kitaban asan nîyo. Ma xebatkaranê weşanxaneyî pîroz kenê. Ma pêro zanê ke kirmanckî bi nuştiş aver şona. Seba ke eserî nuştekî bêrê weşanayene û vilabîyene, weşanxaneyî lazim ê. Ewro eke ma wazenê kirmanckîya ma ya nuştekî hîna xurt biba, wendox û nuştoxê ma hîna zêde bibi, ma ganî destek bidê weşanxaneyê Vateyî ke kitabê kirmanckî bêrê weşanayene, vilabîyene û wendene.

Wendoxê delalî, 

Kombîyayîşê Hîris û Heştinî yê Grûba Xebate ya Vateyî mabênê tarîxanê 21.06.2024- 24.06.2024î de, Dîyarbekir de bi. Nuşteyê verên yê na hûmare çekuyê nê kombîyayîşî yê. Dima şima xebata M. Malmîsanijî ya Etimoloji-XIî wanenê. Nadîre Guntaş Aldatmaz kitabê Veysel Yildizhanî dayo naskerdene. Şukrî Derîn bi nuşteyanê xo yê bîyografîkan na hûmare de zî ma reyra yo. Akman Gedîkî gêrayîşê xo yê Kurdistanê Vakurî ser o nuşto. Efsaneya Pepûkî ser o yew nuşteyê Muzaffer Bahçivanî ra teber, hîrê nuşteyê folklorîkî zî na hûmare de est ê.  Îdris Yazarî yew şîîra Turgut Uyarî açarnaya, şîîra bîne Îsmet Borî nuşta.

Heta hûmara bîne bimanê weşîye de!

Redaksîyon