Şaredarîya Amedî ya Şaristanê Girdî, seba ke cinîyanê ke şîdet dîyo, înan rê destegê huqûqî bêro dayene, Baroya Amedî reyde protokolêk îmza kerd. Hemşaredare Serra Bucak, bale ante muhîmîya protokolî ser o û va "Xebatêka yê Amedî vejîyaye meydan".
Mabênê Şaredarîya Şaristanê Girdî û Serekîya Baroya Amedî de seba ke cinîyanê ke şîdet dîyo, înan rê xizmetê mişawreyî û destegê huqûqî bêro dayene "Protokolê Hemkarîya Girewtişê Xîzmetê Ardimê Edlî û Perwerdeyî yê seba Cinîyan û Personelê Şaredarîye" ame îmzakerdene. Programê îmzakerdişê protokolî de Hemşaredarê Şaredarîya Şaristanê Girdî Serra Bucak û Dogan Hatun, Serekê Baroya Amedî Nahît Eren, Hetkara serekterê Pêroyî Zerîn Turk, Sereka Daîreya Xizmetê Cinî û Keyeyî Ozden Gurbuz û endamê Komîsyonê Cinîyan yê Meclîsê Şaredarîya Şaristanê Girdî û Merkezê Heqê Cinîyan yê Baroya Amedî beşdar bîy.
Hemşaredare Bucak: Xebatêka yê Amedî vejîyaye meydan
Hemşaredare Bucak, derheqê protokolî de qisey kerd û bale ante ser o ke şîdeto ke vera cinîyan o her roje zêde beno û va ke vindarnayîşê şîdetê vera cinîyan, xebatê fahmbîyayîşî yê derheqê şîdetî de û girewtişê ardimê huqûqî û edlî yê cinîyan ke şîdet dîyo, welatî û bajarî de rojeva muhîm a. Bucak va ewro protokolî de noqtaya peyêne ameye dayene ke derheqê cinîyan de ke şîdet dîyo, pîya ame hazirkerdene û wina dewam kerd: "No protokol, şaristananê bînan yê Tirkîya de zî sey protokolêk o ke şaredarîyan reyde pîya yeno îmzakerdene. Labelê ma sey bajarêkî ke zaf wextî ra wareyê cinîyan de xebatan kenê, wareyê cinîyan de organîze benê, derheqê şîdetê vera cinîyan de xebatan kenê, nê heq û tecrubeyan zî protokol de ma ca da û yew xebata yê Amedî vejîyaye meydan. Nê hetî ra ma bi destegê huqûqî yê baroyî û desteg û ardimê şaristanê girdî no protokol vet meydan seba ke cinîyê ke şîdet dîyo, ê ardimê edlî bigîrê. Tîya de yew detayo muhîm est o, şaristananê bînan de peymananê ke ameyê îmzakerdene, tede cinsîyetê avûkatan ke ardim bidê cinîyan ke do ardimê edlî bigîrê, nêameyo dîyarkerdene, protokolê ma de îbareyê ke cinîyê ke do ardimê edlî bigîrê do hetê avûkatêka cinî ra bêrê pawitene û no proseso huqûqî do hetê avûkata cinî ra bêro ramitene, est o û ma ney zaf muhîm vînenê."
'Perwerde do dezgebîyayîşê bikero bihêz'
Bucak dîyar kerd ê sey Şaredarîya Şaristanê Girdî na çarçewaya nê protokolî de do seba xebatkaran tayê xîzmetê perwerdeyî bigîrê û wina dewam kerd: "No zî do hem dezgehbîyayîşê ma hem zî dezgehanê ma yê ke derheqê mucadeleyê şîdetê vera cinîyan û cinsîyetê komelkî de xebatan kenê, bikero bihêz û yew perwerdeyî bivejo meydan. Wa protokolê ma bibo sebebê yew xebata muhîme ke ma do pê şîdetê vera cinîyan, qetlîamê cinîyan kêmî bikerê û ma do mucadeleyo pêt bikerê û ma do netîceyanê weşan bigîrê."
'Protokol ma rê manîdar o'
Serekê Baroya Amedî Nahît Erenî zî îşaret kerd ke resayîşê darizî û edaletî problemêko ekonomîk û muhîm o û wina va: "Tena Baroya Amedî xebata destegdayîşî dana cinîyan ke şîdet dîyo, la çi heyf ke seba ke çimeyê ma yê mewcudî çin ê, ma nêeşkenê naye bîyarê ca. Protokolo ke bi ardimêko zaf manîdar û qîmetin yê Şaredarîya Şaristanê Girdî ame hazirkerdene, xebatê wareyê heqê cinîyan tede est ê û no ma rê manîdar o. Ma zanê ke cinî mucadeleyê heqwaşîtişî de hîna zaf rastê şîdetî yenê. Nê manayî ra ez reyna sipasîya xo pêşkêşê Şaredarîya Şaristanê Girdî kena."
Badê qiseykerdişan, Hemşaredare Bucak û Serekê Baroya Amedî Erenî protokol îmza kerd.
Bale ame antene peymanê mîyanneteweyî ser o
Protokolî de ame teqîbkerdene ke şîdeto ke vera cinîyan o, îhlalêkê heqê însanan o û ameyo vatene ke goreyê îstatîstîkanê tewr baş yê derheqê cîyakerdiş û şîdetê vera cinîyan de, dinya de her 3 cinîyan ra yew cuya xo de tewr kêmî yew rey rastê şîdet û cîyakerdişî ameya. Protokolî de ameyo vîrardene ke Peymana Vernîgirewtişê Her Tewir Cîyakerdişê vera Cinîyan (CEDAW), dewletanê ke îmza kerd, mecbur kena ke heme tedbîran bigîrê (cîyakerdişo pozîtîf zî tede) seba ke cîyakerdişo ke vera cinîyan o bêro wedarnayene û seypêyîya cinî û camêrdî bêro temînkerdene. Protokolî de bale ameyo antene Beyannameyê Vernîgirewtişê Şîdetê vera Cinîyan yê Neteweyê Yewbîyayeyan yê 20ê Kanûne 1993î, maddeya 10. ya Qanûnê Bingeyînî û Peymana Meclîsê Ewropa ya derheqê Vernîgirewtişê Şîdetê vera Cinîyan û Şîdetê Keyeyî de ser o.
'Ganî vera cîyakerdişî de mucadele bêro kerdene'
Protokolî de bale ameyo antene cîyakerdişo ke bingeyê cinsîyetê komelkî ser o yo û wina ameyo vatene: "Teqîbo hemparê nê standardanê mîyanneteweyî yo; kokê 'Cîyakerdişê ke bingeyê cinsîyetê komelkî ser o yo' ke çimeyê şîdetê vera cinîyan o, komelkî zaf xorîn o, bi nê şîûrî ganî vera cîyakerdişî de her wareyê cuye de mucadele bêro kerdene û nê mabên de ganî cinî çarçewaya cîyakerdişê pozîtîfî de taybet û cîya bêrê destekkerdene. Na çarçewa de standardê mîyanneteweyî ke cor ra ameyê vatiş; wexto ke teqîb kenê ke cinîyê ke şîdet dîyo, resayîşê edaletî û mucadeleyê heqî de taybet bêrê destekkerdene, reyna û bitaybetî îşaret kenê ke seba wedarnayîşê nê tewir cîyakerdişî ke kokê ey zaf xorîn ê, ganî perwerdeyê seypêyîya cinsîyetê komelkî yê hîrayî bêrê dayene."
Şaredarîya Şaristanê Girdî do qismêkê xizmetan temîn bikera
Bi protokolê ke ame îmzakerdene, qismêk xizmetê ardimê edlî do bi çimeyanê Şaredarîya Amedî ya Şaristanê Girdî bêrê temînkerdene. Cinîyê ke şîdet dîyo, seba ke destegê huqûqî bigîrê eşkenê muracat bikê Şaredarîya Şaristanê Girdî û Baroya Amedî. muracatê cinîyan, badê ke Merkezê Ardimê Edlî yê Baroya Amedî hetî ra ame kontrolkerdene ke gelo şertan ana bi ca yan ney, do qerar bêro dayene.
Do personelanê şaredarîye rê perwerde bêro dayene
Baroya Amedî, çarçewaya protokolî de do personelê ke Şaredarîya Şaristanê Girdî de xebitîyenê, înan rê perwerdeyan bido.
