Resamo Kurd Murad Bazencîr ke hunerê xo Parîs de îcra kerdinî dinyayê xo bedelna. Bi beşdarbiyayîşê gelêk merdim, hemşehrî û embazanê ey Çewlîg de goristanê Mehlayê Mîrzanî de heq bi. Tazîyeyê ey Camîyê Mehlayê Mîrzanî de ronîya û şarê Çewlîgî bi eleqeyo pîl tazîyeyê resamê xo vîyarna. Badê sereweşîye, keye û embazanê ey sey agahdarî û sipasî taye keyepelan de îlanêk da. Kirdkîyê îlanî cêr de ya:
Sereweşîye û Sipas
Murad Bazencîr (Alaettin, Halit) Paytaxtê Fransa Parîs de 31/08/2024 de dinyayê xo bedelna. O neweşîya bêeman kewtbi, seba weşîya ey yew mudaxaleyê tibî zî netîce nêda. Cenazeyê ey amê Çewlîg ke ûca de amebi dinya û bibi pîl, seba ey bedel dabi, terefê keye, embaz, dost û heskerdoxan û şarê Çewlîg tarîxê 3 Eylul 2024 de Mehlayê Mîrzanî de goristanê keyeyê xo de ame heq kerdiş.
Bazencîr, dewa merkez a Çewlîgî Dugernan (Duernû) de tarîxê 01/12/1961 dayê x ora bi. Mektebo verîn û miyanîn Çewlîg de wend. Serranê cîwanîya xo de grubê çep û welatperwer şinasnê û miyanê mucadeleyî de cayê xo girewt.
Murad Bazencîr, Kîtapxaneyê Deng ke terefê Zekî Adsizî ra amebi ronayîş û yew mude dima dewrê kekeyê ey Faîk Bazencîr kerdibi, rojê abîyayîş ra heta qefelyayîş vera heme tedayî û îşkenceyan vindert û xebatna. Kîtapxaneyê Deng, Çewlîg de semedê vilabîyayîşê fikro cep û sosyalîst, averşîyayîşê mucadeleyo demokratîk û welatperwerî û mucadeleyê vera her tewir tada, pelixnayîş û asîmîlasyon ke şarê Kurdistanî rê benî yew rolo roşnker ard ca.
Derheqê ey de zaf tehqîqat û dawayî abî. Tada, îşkence û girewtişan ra dima semedê emnîyetê ganî 1985‘de paytaxtê Fransa Parîsi de îltîca kerd.
Yew demo kilm de Fransizkî musa, Unîversîteyê Saint Denis Vincennesî de beşa Tarîxê Hunerî de qeydê xo viraşt. Yew hete ra dewamê perwerdeyê xo kerdinî heto bîn ra zî resamo Kurd Remzî Rsa ra derse resimî girewtî.
Badê cû serra 1988 de berhemê ey nawitgehan cayê xo girewtî û bin o şekîl gama ewil eşt warê hunero profesyonel.
Yew zeman ra pey berhemê ey cematê hunerî de yew eleqeyo pîl dî û komanê huneran de sey yew hunermendo şinasîyaye û hesbiyaye cayê xo girewt. Hunermend eynî wext de ronayoxê ‘’La Capitale Galerie’’ ra yo.
Berhemê ey şarîstananê ciya ciya yê Awrupa de û fuaranê hunerî de ameyê mojnayî, koleksîyonanê gelêk hunerperweran de cayê xo girewtî.
Rew hatirwaştişê hunermendo ciwanî qey dinyayê hunerî û mucadeleyê netewî yo demokratik yê şarê ma yew zîyano pîl o.
Ma ey bi heskerdiş û hürmet yad kenî, miyane roşnan de bikewe Resamê ma yo delal!
Ruhê to şa bo birayê ma yo delal, ti go tim zerreyê ma de bicuyî.
Keye û Embazê Ey
Not: Embaz, dost û şarê Çewligî ma ina roja ma ya xemgin de ma têna nêwerdê, ma piyorin rê zerrî ra teşekur kenî.
