Hemşaredarê Şaredarîya Amedî ya Bajarê Girdî Serra Bucak û Dogan Hatunî va ke 5 aşm û nêmî de îdareyê xo de înan zerarê 8 serranê qeyyûmî rast kerdî û nika, bi heme astengîyan goreyê Planê Stratejîkî ê kewtê yew wextê neweyî ke do xizmet bidê heme hetan.
Hemşaredarê Şaredarîya Amedî ya Bajarê Girdî Serra Bucak û Dogan Hatunî, Qonaxê Îskender Paşayî de "Têhetameyîşê Çapemenî" de xebatanê xo yê 5 aşm û nêmî ser o qisey kerdî. Têhetameyîşî de Hemverfekê Meclîsî Emîne Akin û Abdulselam Înceoren, Sekreterê Pêroyî Emrullah Gorduk, serekê daîreyan, endamê meclîsî û zaf rojnamegerî beşdar bîy. Yew sînevîzyonê ke tede xebatê Şaredarîya Bajarê Girdî yê badê weçînayîşan est bî, ame nîşandayene.
Hemşaredare Bucak: 5 aşm û nêmî de ma zerarî rast kerdî
Têhetameyîşî de qiseykerdox Hemşaredar Bucak va ke 5 aşm û nêmî ser o qiseykerdiş asan nîyo, bajarî zaf wext bê hemşaredaranê weçînayeyan û bê meclîsî mend û înan 5 aşm û nêmî de zerarê giran rast kerd. Bucak va ke 8 serran ra dima zerarê ke vejîyayî orte, tespît kerdî û dest bi rastkeriş û weşkerdişî kerd. Aye wina dewam kerd: "Ma awanîyanê xizmetî yê şaredarîye, awanîyanê bînan, Sumerparkî, merkezê kultur û kongre, kreş û wargehan û cayê gêrayîşan de tamîr, weşkerdiş û xebatê tamîrî dayî destpêkerdiş. 8 serran de tîya de yew mîx zî nêameyo şanitene. Yew hetî ra ma nînan tamir kenê, hetê bînî ra ma 3-4 aşmanê peyênan de dînamîkanê bajarî reyde ameyî têhet û seba Planê Stratejîk yê 5 serrî des rey kombîyayîşê 'Grûba Fokusî’ kerdî. Ma Planê Stratejîk ke ma hazir kerdo, Meclîsî ra vîyarna. Ma do butçeyê serra 2025î zî peynîya Êlule de encumenê daîmî ra bivîyarnê. Badê ney, ma do bieşkê hîna konkret, şefaf û biteferuat çi eşkenê bikê, Planê Stratejîk û butçeya xo reyde şarê Amedî reyde pare bikê."
'Ez payîzî ra zaf hêvîdar a'
Bucak va ke xebatê verênî tena tamir û tespîtê karê dewrgirewtî bî û wina dewam kerd: "Badê ney ma do goreyê verênan û hewcedarîyanê bajarî pîya bi aqilêko kolektîf qerar bidê. Coka ez payîzî ra zaf hêvîdar a. Payîz keyf û hêvî dano ma. Ma hamnan xo pey de verda. Bi na mana ma zimistan, 4 aşm û nêm û xebatêk bi gamanê bawerîyan şarê Amedî reyde pîya verê xo de ronayî. Ma verê weçînayîşan vatbî; ma wazenê butçeya şarî û çimeyê şaredarîye seba xebatanê ke faydeyê şarî rê bê, xerc bikê. Ma wazenê hesabê nê heme xerckerdişan, qelem bi qeleme, quriş bi quriş bidê. Ma peyê na qale de yê. Ma wazenê na qale hîna gird bikê, berê yew noqtaya beşdarbîyayî û şefafe."
Hemşaredar Hatun: Ma kewtî yew wextî ke ma eşkenê xizmetî çarx bikê
Hemşaredar Dogan Hatunî zî va ke dewrê verênî de sistemêk virazîyabî ke xizmet nêkerdene û wina dewam kerd: "Ez wazena qala qismê çimeyê însanan bikerî, gama ke yew plansazî yena kerdene tena bi butçe nêbena. Ganî ekîbê ke nê butçe tetbîq kenê zî bi hawayêko raşt bêrê organîzekerdene, bi ruhê yew ekîbî û bi xebatêka ke aştîya karî esas gêna, xizmet bêro kerdene. Çi heyf ke dewrê verênî na mesele berdbî cayêko zaf cîya. Dewrê verênî de şaredarî cayê xizmetî nêbîye, sistemêk ser o xizmet nêdîyayîş awan bibî û no bîbî yew adet. Ma 24 daîre û DÎSKÎ zî tede, seba ke ma biresê xîzmetêko tamwext, embazê ma yê emekdarî ra heta deraceyanê îdarekerdişî, ma ser o xebitîyenê ke ma her kesî cayê tewr raştî de wezîfedar bikerê. Nê prosesê temambîyayîşî reyde Planê Stratejîk nika îmza bî û ma bi kede, plan û butçeya xo kewtî yew wextê ke ma eşkenê xizmetî çarx bikê."
'Wezaretî nêverda ke ma îhale bikerê'
Hemşaredaran, badê qiseykerdişî persê rojnamegeran cewab dayî. Hemşaredar Hatunî persê "Karê xizmetî de şima kotî de tewr zaf zorî ant?" wina cewab da: "Bêguman pakkerdişî de. Tayê tewirê tevgeran, hem spekulasyonê zereyî hem zî karê provokasyonî yê teberî, çi heyf ke nê çend aşman de ma tewr zaf problemî qismê pakkerdişî de antî. Pakkerdiş berpirsîyarîya şaredarîyanê qezayan a. Berpirsîyarîya Şaredarîya Bajarê Girdî de hîrê rayîrê serekeyî est aê la ma waşt ke ma personelanê xo reyde seba problemê pakkerdişî yê bajarî yew îhaleyê pêroyî bikerê. Ma heme kuçeyê ke hîris metreyî ra zafêr ê, girewtî binê Şaredarîya Bajarê Girdî. Ma waşt ke pakkerdişî bigîrê kontrolê xo la Wezaretê Derûdorî, Bajarwanîye û Vurîyayîşê Îklîmî bi kerdişanê tedbîranê tasarufî ma ver de bî dêsêk û nêverda ke ma îhale bikerê. Personelê ke qeyyûmî girewtbî zî karê xo hêdî kerd coka ma bajêr de problemêko cidî yê pakkerdişî ant. Na meseleyo yewin a ke ma wijdanen tewr zaf aciz kena."
'Ma rastê mufetişî ameyî'
Hemşaredar Bucak zî bale ant îmarê bêusul û îhaleyan ser o û wina va: "Ma kotî dest erzenê, cayê ke bêusul akerde bîyê cayê îmarî, cayê ke tewirê şuxulnayîşî vurîyayo û îhaleyê ke xelet û bêusul virazîyayê, û problemê madî û manewî yê girdî ke nînan ardê meydan, vejîyenê vernîya ma. Eke ma na şaredarî yew îdareyê hîna wijdanî, hîna wayirê aqilî û hîna şarheskerdoxî ra bigirewtêne, do no raştîya xo de yew dewrgirewtene bîyêne. Yanî yew xebate ke tede karî dewam bikerdêne, vejîyayêne meydan. La ma cayê ke ameyo, tede zaf zor kerd ke ma nê problemê gird û kombîyayeyî bi kamcîn rayîr û metodan çareser bikê. Ma heyetê teftişî yê zereyî bixebitnê, ma rayîrê huqûqî yê ney bigêrê? Hetê bînî ra ma nînan kenê la hema aşmanê verênan ê xebatanê ma yê 5 aşm û nêmî de ma rastê mufetişî ameyî. No zî meseleyê diyin o ke ma tede zorî antê. Mufetişo çarin yan pancin, derheqê Kreşê Zaf Ziwanî (Zarokistan) de yo ke ma nê peynîyan de akerdî. Kreşê Zaf Ziwanî yê verênî 2015î de abîyaybî, ma tena revîze kerdî û dewreyê neweyî rê hazir kerdî. Derheqê naye de di mufetiş ameyî şawitene. Xebatê ma her game hetê mufetişan ra yenê kontrolkerdene. Zerrîya ma rehet a, ma zanê ma se kenê, her çî bi şefafî şino. La noyo ke sereyê ma ser o sey Şûrê Damoklêsî fetilîyeno, ma zaf aciz keno."
'Heme plansazîyê ma goreyê weçînayîşê ameyox ê'
Hemşaredar Hatunî prosesê badê weçînayîşî îzah kerd û va: "Gama ke ma ameyî, ma tayê kesan reyde ke qeyyûmî sey îdareker tesbît kerdibî, şinasnayî. Ma ameyî û ma heme îdarekerê ke înan tesbît kerdibî, vurnayî. Ma planî viraştibî, ma tesbît kerdibî ke ma do kamî reyde bixebitîyê. %75ê îdarekerê demê qeyyûmî rapor gênê û nêyenê kar. Ma hem DÎSKÎ ra hem zî şaredarîye ra raporê înan Heyeta Hakemî rê rişt. Ma nînan teber ra vînenê. Nêweş nîyê û keyanê xo de yê. Heta ke qeyyûm Şaredarîya Colemêrgî rê ame tayînkerdene, nê ekîban de hêvîyêka gird est bîye. Vatêne ke 24ê Hezîrane de do qeyyûm bêro şaredarîye. Û kesê ke şaredarîye de xebitîyenê zî tersnayêne. La na hêvîya înan puç bî. Nika rojeva ma de qeyyûm çin o. Ma do karê ke ma verê xo de ronayo, dewam bikê. Ma xo rê wextêko 5 serrî da. Ma planê stratejîk yê 5 serran hazir kerd. Heme plansazîyê ma goreyê weçînayîşê ameyox ê."
'Ma wazenê rayîrê bajarî rehet bikê'
Hemşaredare Bucak bale ant problemê rayîrê bajarî ser û nê çî qeyd kerdî: "Meseleya rayîrî yew mesele ya ke ma zaf hesret ancenê. Merdim wazeno ke ma nê panc aşman de eşkaynê hêzê fîloyê xo yê rayîrî lez zêde bikerdêne, bi lez otobusî biherînayêne. Hende bi lez nêbeno, ma nê warî ra yew ozr deyndarê şarê Amedî yê. Tîya bajarêko gird o ke di mîlyonî merdimî tede ciwîyenê. Nika wendegeyî abîyî, unîversîteyî abenê. Ma raşta zî zaf zehmet ancenê, çi heyf ke meseleya trafîkî wina asan nîya ke ma bieşkê çareser bikê. Mesela ma meclîsê xo ra yew qerar vet. Ma wazenê 150 hebî otobusê neweyî biherînê, ma wazenê naye heme bêîmkanan reyde bikê la goreyê tedbîranê tasarufî cewabo ke Wezaretê Derûdorî, Bajarwanîye û Vurîyayîşê Îklîmî dayo ma wina yo; Şima eşkenê tena herinda 14 otobusanê xo yê ke şima kerdê hurda, 14 otobusan biherînê. Ez şima ra persena 14 otobusî kamcîn problemê resê komkî yê nê bajarî eşkenê çareser bikê? Tabî ma do mucadeleyê naye bidê. Ma do bi nuştişanê ke ma do bingeyê burokratîk de Wezaretê Derûdorî û Bajarwanîye rê binusê, naye çarnê eksê ci. Ma wazenê heta aşmanê Sibate-Adare yê 2025î tewr tay 60-70 otobusan bigîrê û rayîrê bajarî rehet bikê."
Projeyê Sistemê Asinrayîrê Sivikî
Bucak va ke no problemê trafîk û resê komkî Sistemê Asinrayîrê Sivik do çareser bikero û wina dewam kerd: "Sistemê Asinrayîrê Sivik do bibo entegreyê rayîranê bînan û do problemê trafîkê nê bajarî zaf rehet bikero. La ma derheqê naye de yew halê teng de yê. Projeyê ma yê Sistemê Asinrayîrê Sivikî programê butçeya Serokkomar de yo la seba ke nê programî de bimanê, ganî ma emser heme xebatanê fizîbîlîte û revîzekerdişî biqedênê ke programê butçeya 2025î ra nêvejîyo. No helbet ma ser de stres virazeno û ma seba naye xebetîyenê. Bêguman ma do nê bajarî rê Sistemê Asinrayîrê Sivikî bîyarê la ma rê wext lazim o. Eke ma tena seba ke no tehda ma ser de est o lez hereket bikê, ma do xeletîyan bikerê."
Xebatê kultur û hunerî
Bucak va ke înan waşt ke xebatê wareyê kultur û hunerî 5 aşm û nêmî de tewr zaf bêrê dîyayene û wina dewam kerd: "Polîtîkayê qeyûman tewr zaf wareyê kultur û hunerî de waşt ke nê bajarî bivurnê, bibedilnê û asîmîle bikerê. Taye zî bî serkewte. Ganî ma naye bivînê, tesîrê naye est ê. Ma ke şîyê Merkezê Kultur û Kongreyî ke tede Serekîya Daîreya Karê Kulturî û Sosyalî est a, ma tesîrê nê asîmîlasyonî ruh, mezg û zerîyan de zaf weş dî. Coka ma nêwaşt ke ma cor ra cor nîyadê naye rê. Ganî na xo zere de bibê wayirê awanîyêk ke vurîyena. Ganî xo zere de reyna bieşkê pak bibê. Ez bi qestî şuxulnena çekuya 'pakbîyayîşî'. Uca de zerarê zaf cidî est ê. Ma yew-di xebatê kulturî kerdî. Ma wazenê ke badê naye xebatanê hîna girdan bikerê. La bêrê bivînê nê tedbîrê tasarufî tîya de zî destê ma girê danê. Gama ke ma nê persî welatanê bînan de serekê şaredarîyanê bajaran ra persayî, vanê 'Ma şîrketan ser ro kenê, ma zaf zî muhîm nêgênê' la gama ke mesele bibo Amed, bibo welatê ma yê na mintiqa, çimî hîna zaf ageyrênê nê hetî ser o. Kamî îhale girewta, kamî daya? Heme pêşnîyaz û metodê bazarîya ma, her şarî rê akerde yo. Mufetişî ameyî seba ke îhaleyê bînan nê warî ra kontrol bikerê. Heme îhaleyê ma akerdeye yê, şefaf ê, eşkenê bêrê kontrolkerdene."
'Wezaret xebatanê ma vindarneno'
Bucak va ke Wezaretê Derûdor, Bajarwanîye û Vurîyayîşê Îklîmî xebatanê ke faydeyê şarî rê yê vindarnena û wina va: "Ma seba tahsîsê yew ersaya ke qezaya Yenîşehîr de ya û seba ding û transferê wasitayanê resê komkî yo, Wezaretê Derûdorî û Bajarwanîye rê nuşte nuşt, agêrayîş nêkerd. Ma seba cayê depo yê xetê tramvayî qezaya Kayapinarî Taxa Talaytepeyî de yew ersa rê tahsîs waşt, Wezaretê Derûdorî û Bajarwanîye rê nuşte nuşt, cewabo neyînî dîya. Derheqê naye de xebatê ma dewam kenê. Ma seba kompleksê sporî yê zafamancan qezaya Kayapinarî Taxa Talaytepeyî de yew ersa rê tahsîs waşt, Wezaretê Derûdorî û Bajarwanîye rê muracat kerd, cewabo neyînî ame dayene. Reyna ma Serekîya Daîreya Xizmetanê Sosyalan wazenê ke seba ciwananê bêkaran kursê meslekan akerê, coka ma qezaya Surî Taxa Cewatpaşayî de yew parsel waşt, ma Wezaretê Derûdorî û Bajarwanîye rê nuşte nuşt, cewabo neyînî ame dayene. muracatê ma ke seba heqê şuxulnayîşê Bircê Keçan bibo tahsîs, reyna ma hetê Wezaretê Derûdorî û Bajarwanîye ra cewabo neyînî girewt."
'Derheqê nekiriştbaran de proseso huqûqî dest pêkerd'
Hemşaredar Hatunî derheqê nekiriştbaran de persan rê cewab da û nê çîyî va: "Ma qerarê ke derheqê kiriştbaran de dîyaybî, bi qerarê meclîsî betal kerdî. Ma heme dezgeyan rê nuşte rişt û goreyê nê nuşteyî ê mahkeme rê muracat kerd û qerarê vindarnayîşê xebitîyayîşî girewt û yew proseso huqûqî dest pêkerd. Mahkeme do derheqê naye de qerar bido. Muşawirê ma yê huqûqî zî her dosya dima şino ke heta ewro heme îhaleyê bêusulî û xeletîyê ke ma tesbît kerdî."
Çimeyê xebere: Şaredarîya Dîyarbekirî
