Fatma Yılmaz
Nê rojanê peyînan de qiseykerdişê manênê Namzetê AK Partî yê Dîyarbekirî yê Şaredarîya Dîyarbekirî û sîmîtroşêk bîyo mesele.
Namzetê AK Partî yê yê Şaredarîya Dîyarbekirî Mehmet Halis Bildenî yew sîmîtroşêkî rê va “Pêrûna sîmîtanê xo bide mi ez 100 TL bîdî to” La sîmîtroşî tira va “Pê 100 TL nê sîmîtî nênê.” Naye ser Halis Bildenî va “Qey ti pereyanê ke ez do bidî to begem nêkenê?” No dîyalogê mabênê Mehmet Halis Bildenî û sîmîtroşêkî, zaf dezgeyanê medya de bi xebere.
Na rey (Çend rojî badê) Dîyarbekir de Parlamenterê CHPyî Sezgin Tanrıkulu verê Camîya Pîle de şi leyê sîmîtroşêkî û ey ra waşt wa sîmîtanê xo biroşo ey û 700 TL pere da sîmîtroşî. Keyfê sîmîtroşê Sezgin Tanrikuluyî ca de bi. Tanrikulıuyî va “Mehmet Halis Bilden o AKPyij hema nêzano sîmîte çiqas a. Sîyasetmadarê înan Qesranê xo ra nêvejîyenê teber û mîyanê şarî, kuçeyan de nîyê. Nêzanê ke şar mîyanê çi feqîrîye de yo.”
Gelo Sîmîtroşê Dîyarbekirî se vanê?
Sîmîtroş Tahsîn Çelîk o ke semtê ofîsî yê Dîyarbekirî de kişta dingê otobusan de sîmîtan roşeno qayîl o wa yew sîyasetmedar raştê ey zî bêro û pêrûna sîmîtanê xo biroşo ey. Çelîk vano ke “ Par sîmîte 5 TL bî emser bîya 10 TL. Verî her kes eşkêne sîmîtan biwero. La nika wînî nîyo. Par ma mîyanê rojî de tepsîya xo qedînayêne û şîyênê yewna tepsî ardêne û aye zî qedînêne. Ma emser nêeşkenê yew tena biqedîne. Nê sîyasetmedarî ne zî îdarekarê dewlete halê ma, halê şarî ra hayîdar nîyê. Ê hevalê ke sîmîtî rotê sîyasetmedaran bişans ê. Werrekna ez zî raştê yewî biamêne ke mi sîmîtê xo birotêne.”
Welatî Cemîl Arslan zî vano ke” Ma êdî nêeşkenê sîmîtan zî biwerê. Ge gane zerra mi şina pê la 10 TL sîmîtêke rê zaf o. Ayra ma çend rojan ra yew xo rê hebêk gênê û wenê. Ez merdimêko teqawût a. Xora maeşê mi mi rê nêvejeno. Ez êdî nêeşkena qûrişêk pere bidî tornanê xo.”
Zazakî News
