Goreyê encamê perskerdiş û cigêrayîşê ke Parlamentoyê Tirkîya de ame parakerdene, sebebê sereke yê kiştişê cinîyan "kêmanîya perwerdeyî" ya.
Goreyê amaranê "Ma do Vindarnayîşê Kiştişê Cinîyan", par Tirkîya û Kurdistanê Vakurî de 394 cinî ameyê kiştene û 295 "mergê şikdarî" estê.
Mudirê Raya Pêroyî Mehmet Akarca, encamê perskerdiş û cigêrayîşê ke serra 2024î de 6 hezar û 400 kesî reyde ameyo kerdene, Parlamentoyê Tirkîya de pare kerd.
Goreyê perskerdiş û cigêrayîşî, se ra 30ê beşdaran nîşan kerdo ke "kêmanîya perwerdeyî" sebebê sereke yê kiştişê cinîyan o.
Se ra 22yê beşdaran vato kiştişî sebebê "problemanê ekonomîkî" ra yenê meydan û se ra 18ê înan zî vato "medya" komelî rê yew meylê şaşî dana.
Se ra 72yê beşdaran dayo zanayene ke ganî kêmkerdişê ceza ya bi bahaneyê "Tehrîq " bi temamî bêro wedarnayene.
Se ra 56ê beşdaran cewabê "Nê"yî dayo persê "Gelo şima fikirîyenê ke qanûnê ke estê seba vernîgirewtişê kiştişê cinîyan bes kenê?"
Beşdaran ra persîyo "Goreyê şima seba vernîgirewtişê kiştişê cinîyan metodê tewr tesîrin çi yo?" û cewabê ke tewr zêde ameyê dayene nê yê:
- Ganî dewlete tedbîranê giranan bigêro
- Ganî kampanyayê hişyarkerdişê komelî bêrê viraştene
- Ganî sewîyeya perwerdeyî ya komelî bêro berzkerdene