Rojda, Diljen Ronî û Azad Bedranî ra dime konserê hunermenda Kurde Xecê zi hîrê bajaran de qedexe bîyê
Tirkîya de Wezaretê Karê Zerreyî 4ê Teşrîna Peyêne de Şaredarîya Mêrdîn, Êlih û Rihaya Xelfetî rê qeyum tayîn kerdbi.
Qeyuman ra dima vera ziwanî û kulturê Kurdî qedexekerdişî dest pêkerdê û konserê hunermendan yenê qedexekerdiş.
Verî Şaredarîya Kûçûkçekmece ya Îstanbulî konserê hunermenda Kurde Rojda ke 17ê na aşme de bibîyêne, iptal kerde.
Dima ra Şaredarîya Şîşlî ya Îstanbulî konserê hunermend Diljen Ronî ke Merkezê Kulturî yê Cemil Candaşî de bibîyêne, bi bahaneya xebatanê awansazî iptal kerde.
Badê zî hunermend Azad Bedranî va ke, konserê ey ke 15ê na aşme de Salona Şaredarîya Murat Paşa ya Antalya de bibîyêne, bi bahaneya ke a roje de salone de yew kombîyayîşo bîn esto, ame iptal kerdiş.
Tewr Peynî hunermenda Kurde Xecê hesabê xo yê medya sosyalî ser o va ke, hîrê konserê aye yê Erzirumî, Agirî û Muşî ke 16, 20 û 21ê na aşme de bibîyênê, ameyê iptal kerdiş.
