Fuat Yaman
Ez nika paweyê metroyêkî ya. Derûdormeyê mi laserê însanan o. Heme kes yew teqeze de yo. Roniştiş çin o, tim yew vazdayîş, tim yew kar tim yew şîyayîş de yê. Axir ke ez ewro rastê sandalîyê vengî ameya. La ge-ge yew kokim yan zî yew cinî, mi verî ra şonê, winasî yew rewşe de ez ca dana înan. Tewr verê ez zaf bander nêbîya, la nika ez bîya vergê rayîran. Tabela ra aseno ke panc deqayî mendê ke metroyê Mecîdîyekoyî bêro. Her deqa de însanî bene zêde. Kes tîya de yewbînî ra nêvano, merheba yan zî şodirbaş. Her kes mîyanê yew tenayî de yo.
Ez semede nê çîyanî ra Îstanbulî ra hes nêkena. Axir ke vengê metro durî ra yeno. Tewr verê vengê ey yeno badê zî hewayêko honik xo de ano. Metro ame verê ma. Tay yenê war, tayî zî nişenê metro. La no kar qet hêdî (giran) nîyo, tim teqeze yo. Naye ra zî, ez pay ra menda, çîyê nêbeno rayîrê mi dûrî nîyo. Ez ewnîyena derûdormeyê xo tewir-tewir însanî est ê. Yew game ra pey ez kewena xeyalanê xo. Welatê mi yeno mi vîr. Ez bena teyrêke û bi firayîş yew game de ez resena koyanê Welatê xo. Qehrê Welat tim zerrîya mi de yew vile akeno. Mezgê mi keweno têmîyan. Destê mi asinê metroyî de xo şidêneno. Her game însanî benê zêde, ez nêeşkena cif bîga. Çimanê mi ver de heme çîyî benê tarî. Badê ez eşnawena ke ez ameya dingê xo û ez xo erzena teber.
Çimanê mi ver de awa Welatî herîkîyena. Însanî eynî rewşe de bi vazdayîş vila bîy. Axir ke ez ameya xo, tikê mi cif girewt û ez rast bîya rayîrê xo ser. Çunke rayîr bi şîyayîş qedîyeno. Demêkî ra pey cinîyêka ameye mi het û va ke “ Afedersiniz; Nazım Hikmet Kültür Merkezi’ne nasıl gidebilirim?” Mi bi ewnayîşêko matmende ewnîya rîyê aye ra û wina cewab da: “ Özür dilerim bende buraların yabancısıyım!” (Bibexşnîn, ez zî xerîbê nê cayan a.)
