Enwer Yılmaz
Şewa bîne Qayserî de Stadyumê Kadir Has de, tena yew mucadeleyê futbolî nê, eynî zeman de yew nimûneyêko tewr hol ê dostanî û centîlmenîye ame mojnayîş.
Lîga 2ine ya TFF ya Play-Offî de fînal de Vanspor û Batman Petrolspor ameyî têver. Nê di taximan hîsêkê şayîye day futbolhezan û bi vindertişê xo yê asîlî zî ameyî teqdîrkerdiş. Xora maçê peyên ê serre no fînal bi. No fînal, mabênê di bajaranê ciranan de, mabênê tutanê eynî erdan de ame kaykerdiş.
Maç destpêk ra heta peynî mîyanê kelecanêk de vîyart. Şarê Wan û Batmanî taximê xo tena nêverday û şîy Qeaserî. Futbolhezê Vansporî û Batman Petrolsporî, wexto ke paştî dayêne taximanê xo xeta dostanî yan zî biratî ra nêvejyay û hürmet nîşanê yewbînan day. Kaykerê ke seha de mucadele kerdêne zî, herinda reqabetî de, yew ruhê centîlmenîye mojnayî. 90 deqa pîya-pîya mend û maç bi derg. Her çiqas golêk nêamey eştiş zî, tereftaran maçêko weş û bi qelîte temaşe kerd. Her di taximan zî kayêko dîqetîn û bi denge kay kerd û no zî îspatê zehmetîya mucadeleyî bi.
Qederê maçî penaltîyan tayîn kerd. Penaltîyan de heyecanêko pîl estbi. Şansê Batmanî çin bi û Vanspor serkewt. Bi skorê 5-4, Vanspor vejîya Lîga 1ine ya TFFyî. Lîga yewine de Amedspor zî kay keno û bi do qayde Vanspor bi reqîbê Amedsporî zî.
Labelê na fînal de yew tenya serkewt Vanspor nêbî. Batman Petrolspor ke zaf weş kay kerd, bi vindertişê xo yê rûmetînî weşê her kesî şi. Her çiqas penaltîyan de vîndî kerd zî, azmê înan û sportmenîya înan şahane bi.
Ez her di taximan bi zerrî ra pîroz kena, û demo ameyîn de înan rê serkewtiş wazena!
