Mîyanê na serre de 2 hozanê ma yê Kirmancan 2 Xidirê şarê ma Xidir Akgul û Xidirê Başî na dina ra bar kerdê. Înan peyê xo de vengê xo, vengê ziwanê xo, nameyê xo û heskerdişê xo verda... Her çiqas ê mîyanê ma de nêbê zî hunerê înan, vengê înan, merdimatîya înan mîyanê ma de yê û ma pê eseranê serberz, hêvdarê ke ziwanê ma do nêmiro, neqlê neslanê neweyan bibo.
Par zî (2022) 2 nuştoxê ma yê ercayê, endamê Grûba Xebate ya Vateyî, emegdarê ziwanê ma Mehmûd Nêşite û Munzur Çem mîyanê ma ra koç kerdbî û dinyaya xo bedilnabî.
Hozananê Dêrsimî ra Xidir Akgul 2yê aşma Tebaxe de rîyê nêweşîyêka xo ra şibi heqîya xo ser.
Xidir Akgul bi şîîran û kilamanê xo yê Zazakî-Kirmanckî Dêrsimde ameyêne şinasnayîş û heskerdiş. Ci de nêweşîya rîşa merdimwere vejîyabî.
Hunermendo ercaye Xidir Akgul bi viraştişê besteyan û vatişê kilaman ziwanê ma rê xizmetêko pîl kerdbi.
Hozananê şarê ma ra Xidirê Başî zî 2 rojî verî mîyanê ma ra bar kerd û şi!.
9ê Teşrîna Verêne pêhesîya ke hozano Gimgimij Xidirê Başî (Hıdır Çelik) Îstanbul de şîyo heqîya xo ser.
Xidirê Başî serra 1955î de dewa Gimgimî Muskan (Beşikkaya) de amebi dinya.
Ey ziwanê ma de hem şîîrî nuştêne, hem kilamî vatêne û hem zî şîîrê xo bi vengê xo wendêne û vila kerdêne.
Xidirê Başî xeylê wext estbi ke nêweşîya xo ver amêne dermankerdiş û nê demanê peyênan de amelîyat bibi.
La çi heyf ke nêeşka nêweşîye ra xelisîya û dinyaya xo vurîna.
Başo ke veng û berhemê nê hozananê ma ameyê qeydkerdiş û parkerdiş ke destê ma qeydê înan esto.
Enwer Yılmaz /Zazakî news
