ZAZAKÎ NEWS - Amed de 66 kesê ke Beledîya Baxlarî ra tewaqût bîyê, seba ke nêeşkayê tazminatê xo bigîrê, şîyê verê bînaya beledîye.
31ê Adare 2023î Weçînayîşanê Mehellîyan de 66 kesê ke Beledîya Baxlarî ra (ke şîya DEM Partî) tewaqût bîyê, sebake nêşîyayê heqanê xo yê sey tazminat û îkramîye bigîrê, şîyê verê bînaya beledîye.
'Vanê pereyî çin ê'
Tewaqûtan ra Nuri Batıbay, îdîa keno ke ê serek û hetkarê ey reyde qisey kerdê û vano, "Çi heyf ke ma rastê tu nîyetêkê baş yê înan nêameyî. Vanê pereyî çin ê, ma sist kenê. Vanê pereyî çin ê la 400 merdimî girewtê beledîye. Vanê pereyî çin ê, 17 mîlyon mesaî nusenê. Vanê pereyî çin ê, faturaya naylonî hazir kenê û pereyan ancenê. Hema zaf çîyê bînî zî estê."
6 aşmî verê cû tewaqût bîyê
Nuri Batıbayî ke verê beledîye de bi nameyê gruban qisey kerd û va ke ê embazanê xo reyde 6 aşmî yo ke tewaqût bîyê la nêeşkayê tu heqanê xo bigîrê. Batıbayî îdîa kerd ke înan zaf rey muracat kerdo la tu cewabêk nêdîyo û vano, "Êdî ma mecbur mendî û ewro ma tîya de dest bi çalakîya roniştişî kerdo. Heta ke ma heqanê xo bigîrî ma do her roj tîya de bê. Ma pêroyî de 66 kesî yê. Înan ra tayê 4 aşmî, 6 aşmî, 9 aşmî yo ke tewaqût bîyê. Heta ewro 1 lîra tazminatê tewaqûtî nêgirewtê. Tazminatê kıdemî, pereyê îznî, îkramîye nêgirewtê."
