Bîngolsporî zî formayê xo yê neweyî bi deyîra kurdkî (Zazakî) da şinasnayîş

Taximê Bîngolsporî yê bajarê Çewlîgî yê Vakurê Kurdistanî formayê xo yê sezona newîye bi deyîra "Way Way Nîna" ya Rencber Ezîzî da şinasnayîş.

Verê cû taximê Vakurê Kurdistanî Amedspor, Vanspor, Batman Petrolspor û Mardînsporî formayê xo yê sezona newîye bi deyîranê kurdkî daybî şinasnayîş.

Badê nê taximan, taximê Çewlîgî Bîngolsporî zî klîba daşinasnayîşê formayê xo yê sezona newîye bi deyîra "Way Way Nîna" ya hunermendê Çewlîgî Rencber Ezîzî vila kerd.

Bîngolsporî  hesabê xo yê medya dijîtale ser ra yew beyanat vila kerd.

"Bêrên ma wayîrîya Bîngolsporî bikerên"

Bîngolsporî va, "Ma bi heyecanêko ke xorînîya tarîxî ra yeno, ruhê Çewlîgî mojnenê çiman ver, kewenê sezona newîye.

Bîngolspor tenya yew taximê sporî nîyo; cewherê nê erdî yo.

O sembolo muştereko her hîkaye û xeyalê ma yo.

Nê sezonî de şansê ma esto ke ma bi têkoşînê xo, cewherê bajarê xo vejê werte."