DEM Partî, tayînkerdişê qeyumî yê Şaredarîya Qaxizmanî ser şermezar kerd û va: "Qeyum, şerê AK Partî yo ke vera heqê weçînayîş û weçînayîşî yê şaran de yo."
Badê ke cezaya hepisî ameybî dayîş, Wezaretê Karanê Zereyî yê Tirkîya ewro 24ê Sibate Şaredarîya Qaxizmanî ya DEM Partî rê qeyum tayîn kerd.
Partîya Seyyewbînî û Demokrasî ya Şaran (DEM Partî) hesabê xo yê medya sosyale ser derheqê ronayîşê qeyumî yê Şaredarîya Qaxizmanî ya Qersî de beyanatêk vila kerd.
DEM Partî bi beyanatêko nuştekî razînêbîyayîşê xo vera qerarê qeyumî nîşan da û va:
"Ê ke îradeya şarî ra tersênê reyna kar ser o yê! Qeyumo ke Şaredarîya Qaxizmanî ya Qersî ser ameyo ronayîş, şerê hukumdarîya AKPyî yo ke vera heqê raydaayîş û weçînayîşî yê şarî de yo."
DEM Partî îlan kerd ke seba ke şaredarîyê înan xizmetê şarî kenê û sistemê bêusulîye vejenê werte, benê hedef.
DEM Partî wina dewam kerd: "Ne ma û ne zî şarê ma xespkerdişê qeyuman qebul nêkenê!
Ma na darbeya ke vera demokrasî, îradeya şarî û hemserekê ma yê ke ameyê weçînayene de ya bîya tu hawayî nas nêkenê! Do sistemê qeyumî rijîyo, şar do bi ser bikewo!"
