Şaredarîya Amedî ya Şaristanê Girdî seba ke werdê pak, weş û erjanî pêşkêşê şarî biko, Aşxaneyê Şarî akerd û şar eleqeyêko gird mojneno ci.
Şaredarîya Amedî ya Şaristanê Girdî, goreyê kerdişanê şaredarîya sosyale, Kuçeyê Hunerî yê Taxa Kooperatîfan a Qezaya Yenîşehîrî de Aşxaneyê Şarî akerd. Aşxaneyê Şarî ke seba ke mesafeyê mabênê vilabîyayîşê ameyeyê şarî teng biko û şarê bajarî rê werdê erjan, pak, weş û bawerpêkerdeyî pêşkêş biko ameyo akerdene, bêyê roja yewşemeyî her roje saete 12.00-18.00 de xîzmet dano. Aşxaneyê Şarî ke bi taybetî seba şarê kêmameyeyî û wendekaran ameyo fikirîyayene, bi 4 tewir werdan rojane hezar kesan rê xîzmet dano. Şaredarîya Şaristanê Girdî, seba ke hûmara Aşxaneyanê Şarî zêde biko ke şar eleqeyêko giran mojneno ci, xebatanê xo dewam kena.
Waştişêkê şarî yo ciddî est o
Endamê Heyetê Îdareyî yê Şîrketa Îştîrakî ya Şaredarîya Şaristanê Girdî MED A.Ş. Mahmut Bora va ke ê saete 12.00 de dest bi servîsî kenê, heta şan saete 18.00 xizmetê xo dewam kenê.
Borayî dîyar kerd ke waştişêkê şarî yo ciddî seba Aşxaneyê Şarî est o û va ke ê rojane hezar kesan rê werd danê û şar memnun o.
Hûmara Aşxaneyanê Şarî do zêde bibo
Borayî dîyar kerd ê do demêko tewr kilm de şubeyanê bînan zî akerê û wina dewam kerd: "Ma zanê ke ekonomîya Tirkîya ameya çi hal. %90ê nufûsî binê sînorê feqîrîye de ciwîyeno. Şaredarîya ma zî heta ke eşkena nê wareyî de hessasîyetanê laziman nîşan dana. Ma do 3-4 noqtayanê bajarî de zî Aşxaneyanê Şarî akerê. Ma do demêko tewr kilm de şubeyanê bînan zî akerê. Nika ma hezar kesan rê werd danê. Ma fikirîyenê ke ma bi destpêkerdişê unîversîteyan na hûmare bikerê 2 hezarî."
'Akerdişê tîyayî seba şarê ma zaf rind bî'
Ozlem Gezgîna ke ameya aşxane, memnunîyetê xo yê nê xizmetî wina îfade kerd: "Ez bi heqê asgarî xebitîyena. Akerdişê tîyayî seba şarê ma zaf rind bî. Xora bi heqê asgarî xebitîyayîş û debara xo kerdene zaf zor o, şertê cuye zaf zehmet ê... Akerdişê tîyayî seba ekonomîya ma zaf faydeyin bî. Hem hetê wendekaran ra hem zî hetê kesan ra ke xebitîyenê, yanî seba ma zaf rind bî. Ma zaf sipas kenê şaredarîya xo rê. Ez reya verêne ameya, tîya zaf weş o; şîrînayîya xo, pirincê xo, werdê xo, doyê xo zaf rind ê, ez wazena ke dewam biko."
'Aşxaneyêk abîyo ke ma eşkenê tewr rind xizmetî bigîrê'
Murat Şahîn Yurtseverî va ez sektorê xisusî de sey pisporê xizmetê sosyalî xebitîyena û wina qisey kerd: "Şertanê ekonomîkî yê nikayênan de aşxaneyêk abîyo ke ma eşkenê bi erjanêko zaf munasib tewr rind xizmet bigîrê. Xizmet rind bi. Rîweşîya personelan rind bîye. Yanî weş bî, ez wazena dewam biko."
'Nê tewir xebatî rind ê'
Ebdurrehman Esgînî dîyar kerd ke o xizmetanê ke ameyê dayene, tira memnun o û fikirê xo wina îfade kerdî: "Akerdişê cayêkê winasî zaf weş bî. Na rasta zî şaredarîya ma ya. Ganî çîyê sey naye zafêr bêrê kerdene. Ez memnun a. Ez şeme zî ameya, werdê înan zaf weş ê. Ez Sûr ra yena. Ez welatîyêko astengdar a. Kesê sey mi nêeşkenê bêrê tîya. Wa Sûr de, Baglar de, Şehîtlik de û Huzurevlerî de zî akerê. Nê tewir xebatî rind ê. Ma bi pereyê werdê tîyayî, nêeşkenê çarşî de yew donêr biwerê."
