Şaredarîya Dîyarbekirî, seba tetbîqê JINKART ke seba cinîyan a ke mabênê 18-64 serrî yê û ameyeyê înan çin o, dest bi girewtişê muracatan kerd. Muracatê ke do internetî ser o bêrê kerdene, 9ê Êlule de do biqedîyê.

Serekîya Daîreya Xizmetanê Cinî û Keyeyî, xebatê ke seba tetbîqê JINKART dest pê kerdbî, qedênayî ke no tetbîq seba asankerdişê cuya rojane yê cinîyan a ke sîgortaya înan çin a. Muracatanê verênan yê JINKART ke seba cinîyan a ke mabênê 18-64 serrî yê û ameyeyê înan çin o,

https://jinkart.diyarbakir.bel.tr/ ra dest bi girewtişê muracatan kerd.

Komîsyon do muracatan bierjno

Muracatê ke seba JINKART bêrê kerdene, do hetê komîsyonê ke Serekîya Daîreya Xizmetanê Cinî û Keyeyî, Serekîya Daîreya Çapemenî, Weşanî û Têkilîyanê Şarî, Serekîya Daîreya Xizmetanê Sosyalan, endamê meclîsê şaredarîye û şaredarîyê qezayan tede yê, bêrê erjnayene.

Do JINKART rê 90 heqê weniştişî bêrê dayene

JINKART ke do otobusanê Şaredarîya Şaristanê Girdî de vîyartbar bo, do aşmêke de 90 (neway) heqê weniştişî bêrê dayene. Do tesîsanê sosyalî yê Şaredarîya Şaristanê Girdî de zî heqê %20 erjanîye zî bêro dayene. Bi aplikasyonê hîraye yê JINKART, hedef o yo ke rehetîya resayîşê cinîyan hetê xizmetan de zî bêro asankerdene.

'Ma proje vejenê meydan

Sereka Daîreya Xizmetanê Cinî û Keyeyî Ozden Gurbuz va ke înan ewro dest bi yew projeya xo ya tewr muhîme JINKART kerda. Gurbuz dîyar kerd ke muracatî do mabênê 26ê Tebaxe-9ê Êlule de bêrê girewtene û îfade kerd ke xebatanê cinîyan de problemê ke tewr zêde vejîyenê, înan ra yew res o.

Gurbuz wina qisey kerd: "Cinîyan vat ke gama ke ê wazenê biresê îhtîyacanê xo yê bingeyînan sey perwerde û weşîye, ê resî de zaf zehmetîyan ancenê. Coka ma projeya JINKART ser o xebitîyayî, sey karta xizmetê sosyalî. Ma şênê aplikasyonê ey demê ameyoxî de hîra bikerê la na game bi taybetî tesîsanê xo yê sosyalan de projeyê kartêk ma vejenê ke do %20 erjanîye bido cinîyan. Aşme de heqê 90 weniştişî do bêro barkerdene. Karte, verê do ê cinîyan rê bêro dayene ke ameyeyê înan çin o,."

Encamî do bi SMS'î bêrê xeberdayene

Gurbuz va ke muracatî do verê înternet ser o bêrê girewtene û îfade kerd ke komîsyonê ke do bêro ronayene do bi leze bixebitîyo û kesê ke muracatê xo kerdo encamê peyênî înan rê do bi SMS'î bêro dayene. Gurbuz qeyd kerd ke welatîyê ke muracatê înan encamêko pozîtîf girewto, do kartanê xo cayê ke ameyî dîyarkerdene ra bigîrê.

Gurbuz dîyar kerd ke xebatanê ke ê do seba cinîyan bikerê, JINKART lingêk a û ê do bi xebat û projeyanê neweyan dewam bikê ke xizmetan bidê cinîyan.