Parlamenterê CHPyî Zeynel Emre da zanayîş ke emser Tirkîya û Vakurê Kurdîstanî de zêdeyê 70 hezar kesî ameyê tepiştiş û êdî hepisxaneyan de ca nêmendo.
Parlamenterê CHPyî yê Îstanbulî Zeynel Emre, munasebetê Roja Heqanê Merdiman a Dinyayî de derheqê rewşa hepisxaneyan, tepiştiş û binpaykerdişê heqanê merdiman ê Tirkîya û Vakurê Kurdîstanî de tay malumatî eşkera kerdî.
"Êdî hepisxaneyan de ca nêmendo"
Zeynel Emre eşkera kerd ke emser Tirkîya û Vakurê Kurdîstanî de 70 hezar kesî ameyê tepiştiş û va: "Emser kapasîteyê hepisxaneyanê Tirkîya 299 hezar kesî yo. Pêroyî de 406 hepisxaneyî estê û kapasîteyê înan 299 hezar o.
Wexto ke AKP ame sere, hûmara mehkuman 52 hezar kesî bî. Nika hûmara înan 378 hezar û 676 kesî ya.
Tena emser zêdeyê 70 hezar kesî ameyê tepiştiş û êdî hepisxaneyan de ca nêmendo."
"Rojnamegerî yenê tepiştiş"
Emre da zanayîş ke serra 2002 ra heta 2024î Tirkîya de 848 rojnamegerî ameyê tepiştiş û va: "Rojnamegerî yenê tepiştiş, xeberî yenê astengkerdiş û rayîr nêdîyeno çalakîyan.
Çi çarçewaya qanunê Cezaya Tirkî de bo çi zî çarçewaya qanunê Têkoşîna Terorî de bo, raştîya xo na ya ke bi nê behaneyan zaf merdimî û rojnamegerî yenê tepiştiş û hepisxaneyan de manenê.
