Serekkomarê Tirkîya Recep Tayyîp Erdoganî va ke, ey emir da ke xebatê fesxkerdişê PKKyî dest pêbikê û va "Nika problemo tewr pîl YPG yo."
Serekkomarê Tirkîya û Serekê Pêroyî yê AK Partî Recep Tayyîp Erdogan ewro kombîyayîşê partîya xo yê Parlamentoyê Tirkîya de qisey kerd.
Erdoganî derheqê Sûrîye de va, "Seba ke reyna Sûrîye bibo rast, ma bi hikûmatê newe yê Sûrîye û dewletanê Erebandir pîya xebetînê."
Erdoganî derheqê prosesê newe yê Tirkîya de zî wina va:
"Ma embazanê xo rê emir da ke xebatê fesxkerdişê rêxistina cîyakare bêrê kerdiş.
Ma sey 85 mîlyon kesî wazenê ke çekî mîyan ra wedarîyê, dêsê terorî birijîyê û ma yewbînî bi hêz verar bikerî.
Amancê ma wedarnayîşê astengê terorî û berzkerdişê huqûqê birayey o.
Seba nê amancî yew averşîyayîşo muhîm zî virazîya. Roj na roj a, roja biratî ya.
Roj roja akerdişê berê aramey a. Roj a roj a ke ma heme erdnîgarîya xo de aştî, îstîqrar û emnîyet serdest bikerî."
"Ma garantîyê emnîyetê Kurdanê Sûrîye yê"
Erdoganî îdîa kerd ke Sûrîye de ê garantîyê emnîyetê Kurdan ê û va:
"Sûrîye de nika problemê tewr cidî rêxistina terorî YPG ya ke qasê 3 ra 1ê erdê Sûrîye işgal kerdo.
Rêxistina terorî ya ke çimeyê xozayînê Sûrîye girewta xo dest, eger çekan nênê war û xo fesix nêkero, nêşkena qederê ke nêzdî beno ra bireme.
Ma Sûrîye de sey heme hetan, çareserkerdişê problemanê birayê xo yê Kurdan zî dima şinî, piştgirî kenî û ma garantîyê emnîyetê Kurdan ê.
Eger ma bêrî ser projeyê bahaneyê zey DAIŞî, êdî înan ra bawer nêbeno.
Eger mintiqa û Sûrîye de bi rastî tehdîdê DAIŞî ra tersnenê, hêza tewr pîle ke şikîna nê meselayî çareser bikero Tirkîya ya.
Wa heme kes destê xo mintiqa ra bianco û ma do bi birayê xo yê Sûrîye ra demêko kilm de DAIŞ, YPG û rêxistinanê bînanê terorîstan zî wedarî."
