ZAZAKÎ NEWS - Komîsyona Hepsiyan ê ÎHDyî bi kombîyayîşê çapemenîye hûmara hepsîyanê nêweşan eşkera kerd
Hemserekê Pêroyî yê ÎHDyî Huseyîn Kuçukbalabanî waşt ganî hepsîyê nêweşî bêrê veradayene û heqê hêvî bêro ca.
Zaf hepsîxaneyanê bajaranê Bakurê Kurdistanî û bajaranê Tirkîya de hepsîyê nêweşî estê. Komîsyona Hepsîyananê Komelaya Heqanê Merdiman (ÎHD) raporêko newe derheqê hepsîyanê nêweşan û hûmara înan de vila kerd.
ÎHDyî bînaya Şaxa Amedî de bi kombîyayîşê çapemenîye rapor îlan kerd. Hemserekê Pêroyî yê ÎHDyî Huseyîn Kuçukbalaban, Serekê ÎHD yê Amedî Ercan Yilmaz, endam û rayberê ÎHDyî kombîyayîş de amade bîyî.
Îlankerdişî ra ver Huseyîn Kuçukbalabanî qisey kerd û da zanayîş ke ê do ewro hûmara hepsîyê nêweşan eşkera bikerê.
Huseyîn Kuçukbalabanî va "Ma wazenê nê dejî êdî bi peynî bê. Ganî dewlete gaman bierzo. La dewlete hema zî tu gaman nêerzena. Çend rojan ra ver DEM Partî û Wezîrê Edeletî pêvînayîş kerd û na mesela amy munaqeşekerdiş. Ganî dewlete verê cû hepsîyanê nêweşan verado û ca de gaman bierzo ke şar dewlete rê bawer bikero."
Dima Nuray Çevîrmen rapor wend.
Goreyê raporî; "Verê 7ê Nîsana 2025ine hepsîxaneyanê Kurdistan û Tirkîya de hûmara hepsîyê cezakerdî yanî ceza înan ser o birîyaya goreyê cinsîyetî wina yo, camêrdî; 330.843 cinî; 14.338, domanî; 1.261, pêroyî; 346.442 kesî yê. Hepsîyê ke yenê muhakmekerdiş goreyê cinsîyetî, camêrdî; 50.494, cinî; 3.374, domanî; 2.750, pêroyî 56.618 kesî yê. Bi giştî hûmara hepsîyê cezakerdî û muhakemenêbîyayî; 403.060 kesî yê.
Hepsîxaneyanê Tirkîya de tewr tay 1412 hepsîyê nêweşî estê. Înan ra 161 cinî û 1251 camêrdî yê. Goreyê tespîtanê ke rewşa înan ser o yê; Na mîyan de 335 hepsî estê ke ma eşkenê rewşa înan sey "nêweşê giranî" name bikerê. Înan ra 230 kesî nêşenê bi tena xo bimanê û 105 kesî zî îhtîyacê înan bi ardimî esto.
Bi pêroyî 1412 hepsîyê nêweşî estê:
14 cinî, 216 camêrdî nêşenê bi tena cuya xo dewam bikerê. 10 cinî, 95 camêrdî bi ardimê embazanê xo îdareyê xo kenê. 27 cinî, 161 camêrdî ganî hertim binê kontrolî de bê. 2 cinî, 36 camêrdî ganî amelîyat bibê. 3 cinî, 18 camêrdî ganî tedawî bibê. 10 cinî, 24 camêrdî lazim o bêro zanayene ke nêweşîya înan çi ya. 33 cinî, 214 camêrdî lazim o rewşa înan bêro şopanayene. 2 cinî, 7 camêrdî astengîya înan a ortopedîk esta. 1 cinî, 22 camêrdî astengîya înan a vînayîşî esta. 2 camêrdî astengîya înan a eşnawitişî esta. Derheqê 60 cinî, 454 camêrdan de malumat kêm o. Derheqê 2 hepsîyê camêrdan de malumat çin o. 161 cinî û 1251 camêrdî bi pêroyî 1412 hepsîyê nêweşî estê."
