Enwer Yılmaz
Welatê ma de se ra zêdêr germawî estê. Zafê xo nika bîyê tesîs û bi resmî falîyet kenê. La belkî çend sey germawî estê ke ko û deştanê welatê ma de estê. No zanistî zî tespît bîyo ke awa germawe xêraneyîn a û xususî kesê ke leşa înan de dej esto şinê germawanê welatî de şîfa gêrenê.
Çewlîg de çend cayan de germawe esta û mîyanê koyanê berzan ê Çewlîgî de to dî çimeyêko pîl ra awa germine esta. Çewlîg de zî sey tesîs nê serranê peyînan de cayêkê germawe esto.
Serra 2014î de hetê Unîversîteya Çewlîgî ra Termalêk virazîyayo. Serra 1998î de mintiqaya ke nika tira vanê Ilıcalar bîya Nehîye. Xora se serrîyo ke uca de germawe (kaplıcalar) estbî. Şarê a mintiqa û dorûver zanênê û kişta laya ke nika zereyê tesîsî ra vîyarena de şîyêne kewtêne awe.
Nika tesîsê Unîversîte xizmetêko weş dano. Tesîs de Hotêlê unîversîte esto û hewzî binê hotêlî de yê. Cayê cinîyan û camêrdan cîya yo. Cayê cinî û camêrdan de eynî çîyî estî. Wexto ke ti şînî Ilıcalar, merkezê Çewlîgî ra 15 km dûr o û rayîrê Erziromî ser o ca gêno. Wexto ke ti kewenê mîyanê tesîsî naver û wever de dikanî estî. Berber, qesab ra bigêr hema her çî esto. Dekewtişê hewze serê merdimî 110 TL yo. Qijan ra heq nêgênê.
Zere de 2 hewzî estê. Yew hewza germine yew zî serdin a. Cayê awa germine û serdine cîya yo. Awe qet boya pîse nêdana û pak a. Hewze zî tim pak a û xeylê xişn a. Ti kincanê xo teber de erzenî dolaba dîjîtale û hînî mefte nêgênê xo dest. Zere de yew hemam yew sauna û yew zî odaya buharî esta. Ti pê a 110 TL pêrûne ra îstîfade kenî. Ti çiqas biwazî hende tede vînenî û çew to ra nêvano ”bes o hînî vej teber.” Wexto ke ti yenî teber seke ti 20 kîlo bîyî sivik. Xora teber ra yew laye vêrena û ti pê temaşeyê aye keyfweş benê. Weverê Termalî de cayê çixarî (pîknîk) esto. Eke ti biwazî xo rê mangal virazî ti 100 TL heqê parke danî û o cayo hîra, baxçeyo xişn de mirda xo wextê xo vîyarnenê. Xora derdor koy ê û hewa tim honik o. Termal qelebalix nîyo û zafê xo keyeyî yenê uca.