Karsazê Amedî vera xeberê Yenî Şafakî ke derheqê Şaredarîya Bajarê Girdî ya Dîyarbekirî de ameybî vilakerdiş beyanat dayî û va: “Rojnameyê Yenî Şafakî qeyûmperestî keno. Ma nêwazenê qeyûmî bajaranê ma îdare bikê. Wa hurmet nîşanê îradeyê şarî bidê.”
Odeya Bazirganî û Sanayî ya Amedî (DTSO) derheqê tayînkerdişê qeyûman de û xeberê ke rojnameyê Yenî Şafakî de vejîyayê de beyanat da.
Beyanatê çapemenî awanîya odeya DTSOyî de ame viraştiş. Serekê DTSOyî Mehmet Kaya û gelêk karsazî û temsîlkarê sazîyanê sîvîlan kombîyayîşê çapemenî de ca girewtî.
Serek Konseya Karî Mustafa Vuralî beyanatê hempîyayî wend û wîna va "Badê weçînayîşê 31ê Adare hêvî bîyêne ke wa nermîyêk bibo. Semedo ke wa herêma ma de tîcaret bibo, turîzm aver şêro û warê karî de îstîhdam bibo çi destê ma ra yeno ma kenê. Ma yewbînî baş zanê. La çi heyf ke tay kesî ke xo ra vanê "rojnameger" pê zûran û îftîrayan kenê ke herêma ma xirab bimojnê û pê tersa qeyûman bêhûzûrîye vejê. ”
Serekê DTSOyî Mehmet Kayayî zî qiseykerdişê xo de va ke "Bajarê ma de 2 milyon kesî cuyenê. Bajarê ma bi yew tewr aqil nêno îdarekerdiş. Serra 2018î ra nata, mîyanê 6 serran de 6 kesê cîyayî Beledîye îdare kerdê. Eke şima her roj îdarekarêko newe tayîn bikê o bajar tepîya şino û nêeşkeno bajaranê bînan reyde reqabet biko. Polîtîkaya qeyûman zirar dana ekonomîya bajarê ma.”
