Bajarê Diyarbekiri mîyanê mîrasê tarîxî û kulturî de ca gêno. Qezaya Sûrî de kêmîya cayê parkî û otoparkî şarî aciz kena. Şar wazeno ke wa îdarekerî çareyêk bivînê.
Her roje hezaran tûrîstê teber ra yenê qezaya tarîxî ya Sûrî ya Diyarbekiri û Mîyanê Sûrî de qelebalixîya trafîkî roj bi roj zêde bena. Heta nika îdarekeran ra çareyêko bingeyîn nêameyo vînayîş û semedê cayê parkî meydanêk nêameyo viraştiş. Tûrîstê ke yenê Mîyanê Sûrî, zafane nêeşkenê cayê parkî bivînê, mecbur manenê ke bi erebeyanê xo 3-4 rey dormeleyê Sûrî de bigeyrê. Şoforê ke nêeşkenê cayê parkî bivînê, zafane mecbur manenê ke Sûrî ra vejîyê û erebeyanê xo semtanê Eski Hal, Yenişehir û Ofisî de park bikerê.
Wayîrê erebeyan ê ke nêeşkenê otoparkanê Saraykapı û Balıkçılar Başî de ca bivînê, vanê ke, ma peyser Sûr ra şinê. Zekî Doğan, ke teber ra seba karanê nêweşxaneyî ameyo Diyarbekir, rastê zehmetîya cayê parkî ameyo. Doğan, ke bi erebeya xo ya xususî Sûrî de cayê parkî nêdîyo û rayîrê Saraykapı de geyra yo, vano ke, dima di rey ser Cadeya Gazî de şiyo Balıkçılarbaşı. Doğan vano ke, erebeya xo Eskî Halî de park kerda.
Amebi cîger biwero la...
Doğan ke problemê xo Zazakî News rê va, wina qisey kerd: "Mi va, ma xo rê cigerêk biwere. Seba ney ez şîya Sûrî. Labelê ma saetêk cayê parkî gêrayê. Peynî de mi erebe cayêko nêzdîyê Eskî Halî de park kerd û ez şîya Sûr. Raştîya xo de verê ke ez bêrî, tayê kesan hîşyarî dabi mi ke 'Ti Sûrî de cayê parkî nêvînenî'. Mi texmîn nêkerd ke ez do cayêko wîna tarîxî û muhîm de rastê problemê parkî bêrî. Ma bi desan erebeyan reyde bi deqîqeyan Sûrî de geyrayî û ma cayê parkî nêdî. Ma teber ra Diyarbekir zey bajarêko gird û averşîyaye nas kenê. La belê estena problemêka wînayene û çarenêkerdişê aye balkêş o. Cayêko wîna de, bajarêko hende gird de, çarenêkerdişê nê problemî hetê îdarekran ra û çarenêkerdişê ey ecêb o. Ganî çarekerdişê nê problemî û mexdûrnêkerdişê şarî hende zehmet nêbo. Beno ke reyêka bîne ke ez bêrî Diyarbekir, ganî ez hezar rey bifikirî."
'Şar bi erebeyanê xo nêyeno Sûrî'
Esnafê Sûrî zî nê rewşî ra zaf şîkayet kenê. Esnafan veng da îdarekeran û waşt ke demêko kilm de çareyêk problemê otoparkî rê Sûrî de bivînê. Esnaf Yunus Yilmaz, ke bale ant Meydanê Dağkapı ser, wina va: "Çarşîya Selaheddîn Eyyûbî rewşêka bêfonksîyon de ya. Kes nêkeweno û nêvejîyeno çarşî. Corê aye zî meydanêka gird o û ser aye de kes nêgeyro. Eger no ca bibo cayê otoparkî, no do nê problemî kokî ra çareser bikero. Uca yan zî cayêko bîn de. Bi taybetî ma veng danê şaredarîye. Seba nê problemî şar nêwazeno bi erebeyanê xo bêro Sûrî. Eger bêrê zî erebeyanê xo teberê Sûrî de park kenê û mecbur manenê ke bi deqîqeyan rayîr ra şorê. Nêweşê înan, tutê înan, kokimê înan, diganê înan estê. Mexdûrkerdişê nê şarî û nêdîyayîşê çareyî kêmasî û bêxemîya îdarekaran o. Bi taybetî ma veng danê şaredarîye, ma wazenê ke ê ca de çareyêk nê problemî rê bivînê."
Fatma Yilmaz
