Parlamenterê Partîya Seypeyî û Demokrasî ya Şaran (Partîya DEMî) Sirri Sureyya Onderî ke Heyeta Îmralî de ca gêno, bîyayîşanê peyênan ser o qisey kerd.
Onderî Ajansa Mezopotamya rê qisey kerd û va ke, Serekê Partîya Karkeranê Kurdistanî (PKK) Abdûllah Ocalanî aştî ser o bi hawayêko zelal qisey keno, la dewleta Tirkîya hema qerarê xo yê peyênî nêdayo. Dewlete hîna qerar nêdayo ke do bi Kurdan çi biko.
"Ocalan zî hereketê Kurdan zî seba aştî helwêstêka zelale mojnenê. Eke dewlet zî dest bi zelalbîyayîşî bikero, o wext do prosesê raştîn dest pêbikero."
Ey îfade kerd ke seba nê pêvînayîşan nika nêvanê "prosesê çareserîye" la va ke aştî yew gama muhîm û verêne ya çareserîye ya.
Onderî va ke ê sey Heyeta Îmralî dîqetê xo danê pozîtîfbîyayîşî ser û seba ke çîyê hewlî bibê çi destê înan ra yeno kenê.
Parlamenterê Partîya DEMî va ke, proses çiqas aver şêro, do zaf çî hîna zelal qisey bikerê.
Serekê Partîya MHP Devlet Bahçelî, ke wertxê Partîya Edalet û Averşîyayîşî (AKP) ya hukmatî yo, peynîya serra vîyarte de vengê xo da Ocalanî ke parlamentoyê Tirkîya de bêro qisey biko û venga xo bido feshkerdişê PKKyî.
Bahçelî dima va ke ê wazenê Partîya DEM û Ocalan ke serra 1999î ra nata Hepisxaneyê Îmralî de yo, pêvînayîş bikerê.
Onder û parlamentera Partîya DEMî ya bîne Pervîn Buldan 28ê Kanûne de Ocalanî reyde kom bîyê.
Ocalanî hetê Onder û Buldanî ra îlan kerd ke o eşkeno seba "paradîgmaya newîye" tayn gamanê pozîtîfan bierzo.
Onder, Buldan û sîyasetkarê verên Ahmet Turk rojê vîyarteyî de partîyanê sîyasîyan ê parlamentoyê Tirkîya reyde kom bîyê.
Ê peynîya hefteyî şîyê zîyaretê sîyasetkaranê girewtîyan Selahattîn Demîrtaş û Fîgen Yuksekdage.
Yeno pawitene ke Heyeta Îmralî do rojê verênan de şêrê zîyaretê Ocalanî û dima do bîyayîşan û prosesî ser o beyanatêko hîra bidê.
Çime: Ajansa Mezopotamya
