Şaredarîya qezaya Dîyarbekirî Pasûrî qeza de yew konser tertîp û şarî eleqeyêko weş mojna konseri rê. Şarî bi deyîranê kurdkî heta erey şewe mirdîya xo govend kay kerd.
Labelê semedo ke programê konserî de qet ca nêdîya Zazakî şarî razînêbîyayîşê xo mojna.
Şaredarîya Pasûrî ya Dîyarbekirî ke DEM Partî destê qeyûmî ra girewtbî, Parka Turgut Ozalî de yew konser tertîp kerd. Hunermendî Hîvron û Mizgîn Turan vecîyayî sehne deyîrê Kurdkî vatî.
Verê cû hunermende Mizgîn Turane vecîya sehne û mêmanan goşdarîya aye kerd.
Zafêrîya beşdaran ciwanî bî. Dima ra zî Hîvron vecîya sehne û deyîrî vatî.
Şarê Pasûrî zafê xo Kurdkîya Zazakî qisey keno. Semedo ke konser de deyîrê Zazakî çin bî mêmanan vera ney hêrsê xo mojna.
Şarê ucayî wazeno ke, eke konser bido dayîş wa yew hunermend/e zî Zazakî vajo.
Hemşaredaranê Pasûrî Fatma Ay û Murad Îpek zî konser de qisey kerd. Hemşaredaran bale ante zordarîya ke kurdkî ser o û va ke, semedê Kurdkî xebatê înan do dewam bikê.
