Xebere/Arif Bulut
Dîyarbekir ra 130 kilometre dûrî, qezaya Pasûr de Mintiqaya Kasorî qasê serrîyo ke hete şirketanê madenî ra binê tehditî der a.
Aşma êlıle Keşkelunî ya vîyarte de xebatê gêrayîşê madenî bîy sebebê protestoyanê şarî. La Enstîtuya Tetqîqat û Cêrkerdişê Madenî (MTA), her çiqas şar nêwazeno zî mintiqa de xebatanê sondajî rê dewam kena.
Mintiqaya Kasorî ke yew mintiqayanê tewr muhîmanê Dîyarbekir û Pasûrî ra ya, 60 mehleyê ci estê û 25 hezar kesî ci ra awe ancenê.
Şertê hewayî û coğrafîya mintiqa de yew kombînasyonê ekolojîkê cîya viraşto.
Wina ke 30 tene darê kestanêrî yê ke seserrî ra zafêr emrê înan esto, Mintiqaya Kasorî de dewa Ku de yê.
Şaro ke dewanê Ku, Avdeges, Cıxse, Gomak û Arkatinî de ciwîyenê û bine tesîrê ocaxanê madenî de manenê, vanê ke maden têna înan rê nê, Pasûr û cayanê dorûverî rê zî zerar dano û coka gere ke ê tena nêmanê.
Têkoşînê şarî hetê Platformê Pawitişê Mintiqaya Kasorî ya Pasûrî ra yena berdene.
Na xebata vetişê madenî Pasûr de yewin nîya. Heta nika 39 projeyê cîya-cîya yê madenî hedefê na mintiqa bîyê.
Şarê ke Mintiqaya Kasorî de ciwîyenê û ziraet û heywandarî ser ro debara xo kenê, derheqê prosesê vetişê madenî û fikranê xo yê ke vera vetişê madenî de yê, Zazaki News rê qisey kerd.
Şaro ke zenginîya Mintiqaya Kasorî ra behs kerd va: "Eke mutleq yew çî kenê wa bêrê tîya merkezê kayakî û turîzmê tebîetî rê munasib o. Wa bêrê naye bikerê, no hîna bêzerero û gelîrê ey esto. La ca ra naye tebîet xerepnenê û ma mecbûrê koçê diyîn kenê. Ma do vera naye vindê. Ma nêrakenê."
