Şaredarîya Amedî ya Şaristanê Girdî, emser 3 hezar wendekaran rê ke reya verêne unîversîte de ca girewto, 15 hezar TL destegê perwerdeyî dana.
Şaredarîya Şaristanê Girdî, wendekaranê ke verê 13ê Tebaxe ra Amedî de roniştenê û reya verêne unîversîte qeyd kenê rê destegê perwerdeyî dana.
3 hezar wendekarî do îstîfade bikerê
Çarçewaya projeyî de ke hetê Serekîya Daîreya Xizmetanê Sosyalan ra yeno kerdene, 3 hezar wendekarê 30 serrî û tayêr ke unîversîteyê dewlete yan zî taybetiyan de bi bursê %100î ca girewto û reya verêne unîversîte qezenç kenê, înan rê 2 aşman de 5 hezar TL û pêro pîya 15 hezar TL destegê perwerdeyî yeno dayene.
Muracatan 3ê teşrîna verêne de dest pêkerd
Muracatîan ke 3ê teşrîna verêne de dest pêkerd, 1ê teşrîna peyêne de qedîyenê. Wendekarî bi dayîşê melumatê numreyê nasnameyê TC, name û paynameyê xo şênê adresa https://egitimdestek.diyarbakir.bel.tr/ ra muracatê xo bikerê. Wendekarê ke pê Testê Pêroyî yê Qabîlîyetî unîversîteyanê dewlete de ca girewto û wendekarê ke unîversîteyanê Weqif/Taybetiyan de bi bursê %100î ca girewto, do bi teslîmkerdişê belgeyanê xo muracatê xo bikerê.
Badê ke belgeyê muracatî ameyî kontrolkerdene, tarîxanê ke ameyê dîyarkerdene, destego ke behs beno do hesabê wendekaran rê bêro erşawitene.
