Serekê Qezaya Qaxizmanî ya Qersî yê DEM Partî Mehmet Alkan kar ra ame dûrvistiş û cayê ey de qeyum ame tayînkerdiş.
Dadgeha 2. ya Cezaya Girane ya Qersî 20ê Sibata 2025î de bi îdîaya "endamîya rêxistinî" 6 serrî û 3 aşmî ceza da Hemserekê Şaredarîya Qezaya Qaxizmanî ya Qersî Mehmet Alkan.
Ceza ra dima, rayber û endamê DEM Partî bînaya şaredarîye de dest bi çalakîya nobetî kerdbî û polîsan zî şaredarîye dorpêç kerdbî.
Dorpêçê 5 rojî yê polîsan ra dima roja 24ê Sibate Hemserekê Şaredarîya Qaxizmanî Mehmet Alkan kar ra ame dûrvistiş û cayê ey de qeyum ame tayînkerdiş.
Wezaretê Karanê Zereyî yê Tirkîya îlan kerd ke, seba ke Dadgeha 2. ya Cezaya Girane ya Qersî bi îdîaya "endamîya rêxistinî" 6 serrî û 3 aşmî ceza dayo, Serekê Qaxizmanî Mehmet Alkan kar ra ame dûrvistiş û Qeymeqamê Qaxizmanî Okan Daştan sey qeyum cayê ey de ame tayînkerdiş.
Weçînayîşê 31ê Adara 2024î ra dima, 10 şaredarîyê DEM Partî û 2 şaredarîyê CHPyî ser pêroyî de 12 şaredarîyan rê qeyum ame tayînkerdiş.
Wezaretê Karanê Zereyî yê Tirkîya 31ê Adare ra nat şaredarîyanê DEM Partî yê Colemêrg, Mêrdîn, Êlih, Dêrsim, Xelfetî, Akdenîz, Miks, Sêrt, Wan û Qaxizmanî rê qeyum tayîn kerd.
