Sereştişê keyeyan yê Stenbol, Îzmîr û Edeneyî de rojnamegerî, hiqûqnasî û endamê rêxistinanê komelanê sivîlî zî mîyan de zaf kesî ameyî tepiştiş.
Protestoyê ke seba tewqîfwîyayîşÊ Şaredarê Bajarê Girdî yê Stenbolî Ekrem Îmamoglû dest pêkerdbî zaf bajaran de dewam kenê.
Ewro sereştişê keyeyan yê Stenbol, Îzmîr û Edeneyî de zaf kesî ameyî tepiştiş.
Serekê TKPyî yê Stenbolî Ahmet Dîncel, endamê PMa TKPyî Arda Haciyûsûfoglû û 3 endamê partîye ameyî tepiştiş.
Partîya SOLî zî eşkera kerd ke avukat Denîz Demîrdogan zî mîyan de zaf îdarekarê înan ameyê tepiştiş.
Îzmîr
Endama MYKa Partîya Azadîya Komelkî (TOP) Dîdar Gul, endamê grûba muzîkî ya Praksîsî Soner Kuçukerguler, Sereka SGDFî yo verêne Şukran Yaren Tuncer û Gokhan Erdem, Sema Nûr Demîrtaş, Berk Çukurcam, Mehmet Duman û Gulşen Sude Avci Îzmîr de ameyî tepiştiş.
Ame zanayîş ke mîyanê tepiştişan de avukat Goksel Akbaba zî esto. Akbaba vizêr waştbi Rêvebirîya Emnîyetî ya Bajarî de muwekîlanê xo bivîno, la hetê polîsanê emnîyet ra amebi vetene.
Reyna Serekê Baroya Îzmîrî yo verên Ozkan Yucel zî ame tepiştiş.
Edene
Edene de zî polîsan protestoyan rê midaxele kerd û zaf kesî bi prodayîş ameyî tepiştiş.
Vengdayîşê CHPyî ya Edene ser şar Bulvarê Turgut Ozal ê qezaya Çukurovayî de kom bi û ver bi Bulvara Ugur Mumcuyî rayîr ra şi.
Rayşîyayîş ra dima, kome waşta Bulvara Turgut Ozalî û Caddeya Barajyoluyî ser şêr la polîsan bi awe, gulleyê plastîkî û bombeyanê gazî midaxeleyê înan kerd. Midaxele de zaf kesî ameyê tepiştiş.
10 rojnamegerî zî ameyê tepiştiş.
Stenbol û Îzmîr de polîsan eşt keyeyanê zaf rojnamegeran ser.
Sereştişê keyeyan yê Stenbolî de rojnamegerî Zeynep Kuray, Bulent Kiliç, û Hayrî Tunç, muxabîrê AFPyî Yasin Akgul, muxabîrê NOWî Alî Onur Tosun, nuştoxê BîrGunî Bariş Înce, muxabîra Sendika.orgî Zîşan Gur û muxabîrê resiman Kurtuluş Ari ameyî tepiştiş.
