Serekê weçînaye yê Amerîka Donald Trumpî da zanayîş ke Tirkîya peyê rijîyayîşê hukmatê Esedî de ya û va, "Tirkîya bi hawayêko dişmenî Sûrîye kontrol kerd û rayîr da grûbanê çekdaran ke bikewe zereyê Sûrîye."
Donald Trumpo ke do 20ê Kanûna Peyêne dest bi wezîfanê xo biko, Palm Beach de cewab da persanê rojnamegeran.
Trump reya verêne rijîyayîşê rejîmê Baasî yo 61 serrî û hukmatê Esedî yo 53 serrî ser o qisey kerd û va, "Tirkîya peyê rijîyayîşê rejîmê Esedî de ya."
Goreyê vatişê Trumpî Tirkîya hêzêka girde ya û wayîrê ordîyêka zaf xurte ya.
Serekê weçînaye yê Amerîka wina va: "Tirkîya peyê rijîyayîşê rejîmê Esadî yê Sûrîye de ya. Erdogan merdimêko zaf fena yo. Demêko derg ney waşt û bi ser kewt.
Bi raştî kes nêzano kamcîn serkewtî yo labelê mi gore Tirkîya qezenc kerd. Erdogan merdimêko zaf fena û zehmet o.
Tirkîya bi hawayêko dişmenî Sûrîye kontrol kerd û rayîr da grûbanê çekdaran ke bikewê zereyê Sûrîye. Esad qesab bi. Ma dî ke ey gedeyan rê se kerd."
Serekê weçînaye yê Amerîka tekîd kerd ke Amerîka eşkena herême de Tirkîya dir bixebitîyo û persê "Şima do seba 900 eskerê Amerîka yê ke Sûrîye de yê se bikerî?" ser o wina va:
"Ganî rayîrêko bîn bibo. Înan ra yew zî Tirkîya ya."
