Goreyê netîceyanê verênan ê weçînayîşê Almanya , 6 Kurdî ameyê weçînayîş û do şirê parlamentoyî
Semedê weçînayîşê pêroyî yê verênan ê Almanya karê raydayîşî vizêr bi saete 18:00 ya Almanya qedîya.
Almanya de weçînayîşê pêroyî yê Parlamentoyê Federalî yê Almanya Partîya Yewbîyayîşê Xirîstîyanan (CDU) se ra 29ê rayî girewtî û bî partîya yewin.
Partîya muxalefetî ya Almanya (AfD) ke wayirê fikrêkê raştgirê ya, bi se ra 19.5ê rayan bî partîya diyine.
Partîya Sosyal Demokrat (SPD) ya Serekwezîrî Olaf Scholz bi se ra 16ê rayan bî hîrêyine.
Partîya Keskan (Die Grune) zî bi se ra 13.5ê rayan goreyê weçînayîşê 2021î rayê aye se ra 1.2 kêmî bîyê.
Partîya Çep se ra 8.5, Partîya Demokrat a Azad (FDP) se ra 4.9 û Hempeymanîya Sara Wagenknecht zî se ra 4.7ê rayî girewtî.
6 Kurdî ameyê weçînayîş
Goreyê netîceyanê heta nika, kurdan ra Gokay Akbulut, Cem Înce, Ferat Koçak û Mîrza Edîs ê Partîya Çep ra, Qasim Tahîr o Yewbîyayîşê Keskan ra û Serdar Yuksel o Partîya Sosyal Demokrat ra ameyê weçînayîş.
Serdar Yukselî hesabê xo yê Instagramî ra îlan kerd ke o bi se ra 33ê rayan ameyo weçînayîş û sipasîya hetkaranê xo kerd.
Weşîyanê Almanya de pêro-pîya 12 namzedê Kurdî estbî.
