Goreyê Raporê Çimdarîya Medya yo ke Erol Onderoğluyî bianetî de weşanayo, çar aşmanê peyênan de Tirkîya de di rojnamegerî ameyê kiştişî, 17 rojnamegerî ameyê tepiştişî û 14 rojnamegerî ameyê mehkemekerdiş. Goreyê raporî, no dem de RTUKî 60 cezayê giranî dayê medya û zaf keyepelî ameyê astengkerdiş.

Raporê RSFî rewşa xirabe aşkere keno

Goreyê Raporê RSFî yê serra 2024î, Tirkîya de hûmara rojnamegeranê tepişteyan kêm bîya, labelê bitaybetî kontrolê edlî yo ke rojnamegeran ser o yo zêde biyo. Erol Onderoğluyî, temsîlkarê RSFî, dîyar kerdo ke no çî nîşan dano ke dewlete metodê newe yê zextî şuxulnena.

60 rêxistinan qerarê RTUKî şermezar kerd

60 rêxistinê azadîya çapemenîye û fikrî, qerarê RTUKî yo ke 30 serrî yo weşan keno Radyoya Açikî birrnayo, şermezar kerd. Beyanat de ame vatiş ke "No qerar vera medyaya xosere û azadîya fikrî derbeyêka giran a. Ganî destûrê weşanî yê Radyoya Açikî bêro dayîş."

Parlamentoya Ewropa paştgirîya rojnamegeran kerde

Parlamentoya Ewropa, qerarêko şermezarkerdişî yo vera zextê dadgehî yê ke Bulent Mumay, Koordînatorê DW Tirkîya yê Îstanbulî ser o yê ke seba rexnekerdişê hewldananê sansurî yê Şîrketa Met-Gunî 20 aşmî ceza girewto û na ceza hetê Dadgeha Îstînafî ra ameya qebulkerdiş, qebul kerd.

16 Rêxistinan rayberanê YEyî rê mektub erşawit

16 rêxistinê mîyanneteweyî yew mektuba muştereke Serekê Konseya Ewropa Charles Michel û Sereka Komîsyona Ewropa Ursula von der Leyen rê erşawite. Mektub de ame waştiş ke Tirkîya na qerarname bi temamî tepya bigîro.

IPI, RSF, CPJ û ECPMF Enqera de ameyî têhet

Rêxistinê mîyanneteweyî yê rojnamegerîye rayberîya IPI û beşdarîya RSF, CPJ û ECPMFî reyde Enqera de hirê rojî pêvînayîş kerd. Heyet, Dadgeha Qanûnê Bingeyênî, RTUK, partîyê muxalefetî, rojnameger û nûnerê dîplomatîkan reyde kom bi.

Qerarname do medyaya xosere biko hedef

Kombîyayîşan de ame dîyarkerdiş ke no qerarname do bitaybetî dezgeyanê medya yê ke ardimê fonê mîyanneteweyî reyde weşanî dewam kenê, biko hedef. Heyetî waşt ke no qerarname bêro redkerdiş.  Qerarname de çekuyê sey "vera menfeatê sîyasî yê zere û teber", "rêxistina xerîbe" û "çalakîya şerî" ameyê şuxulnayîş ke no çî do bibo sebebê zextan ser her tewir xebatanê rojnamegerîye.

Rêxistinî vera tepiştişê rojnamegeran vejîyayî

No dem de, tepiştişê rojnamegeran sey Nevşin Mengu, tehdîtê serekê MHPyî Devlet Bahçelî, operasyonê ke medyaya kurdî ser o yê û kiştişê rojnamegeran Nazim Daştan û Cîhan Bîlgîn Vakurê Sûrîye de, êrişê ke Balıkesîr de rojnameger Hakan Sataroğluyî ser o bîyo û mudaxeleya Wezîrê Zereyî Alî Yerlîkaya ya ke kameraya ANKAyî ser o bîya zî bîyê sebebê tepkîyanê rêxistinan.

Çime:

  • Bianet
  • RSF
  • Botan Times