Amedspor 12ê Kanûna 2024î de kongeya xo viraşt. Verê kongre serekê Amedsporî Azîz Elaldı yo ke Amedspor kerdbi şampiyon îstîfa kerdbi. Kongre de Burç Baysal sey sereko newe amebi weçînayîş.

Amedspor zanîyeno ke tena yew taximê futbolî nîyo nasnameyê Amedî yo Kurdkî ser o awan bîyo û tena mîyanê şarê Amedî de ney mîyanê şaranê bajaranê dorûver, her cayê Tirkîya û ewropa de yeno teqîpkerdiş û heskerdiş. Amedspor de tim domara Kurdîtî estbî.

Şaro ke demokrat o, heqanê Kurdan (Kurmanc-Zaza) û heme heqanê ke çarçiwaya heqanê merdiman ê mîyannetewî de ca gênê, wayîrê Amedsporî vejîyeno.

Semedo ke nasnameyê Amedsporî wîna yo zî nijadperestî tim fek erzenî Amedspor, heqeretê ci kenê û wazenê wa Amedspor futbol kay nêkerê û wazenê wa taximêko wîna çîn bo.

Ayra ma pêro tim wayîrê name û futbolê Amedsporî vejîyenê.

Seke ma zanê semedo ke Amedspor taximêkê Dîyarbekirî yo parekerdişanê xo yê medyaya sosyale de hem ca dayêne Kurmanckî hem ca dayêne Zazakî. Sey nimune wexto ke parekerdişêkê wayîrvejyayîşî kerdêne vatêne:

Xwedîyê Amedspor derkevin

Wayîrê Amedsporî vejîyêne

Amedspor’a sahip çık

No zaf keyfê ma ardêne. Yew kelîma bo zî Zaza û Kurmancê ma ziwanê xo meydanê sporî de dîyêne.

Labelê çi heyf ke rayberîye newîye hem parekerdişê xo yê Kurdkî kerdî kêmî hem zî parekerdişanê xo de Zazakî wedarit!

Xora ma Zanê ke Zazakî mîyanê rewşêka xirabine de ya. Roj bi roj helîyena şina. Êdî tut-gedeyê ma qisey nêkenê û sibaroj beno ke vîndî biba.

Zazakî rê wayîrvejyayîşê sîyasetî û dezgeyê sîvîlî sporî zaf qîmetin o.

Labelê çi heyf ke kes qîmetê ziwanê xo nêzano. Êyê ke nêzanê xora nêzanê ma nêeşkenê çîke vaje. La êyê ke halî hazir de zanê zî xemê înan de nîyo.

Eke Amedspor qerar girewto ke ca nêdo Zazakî gelo sebebe ey çi yo?

Tay kesî, vanê verî Azîz Elaldı estbi o bi xo Zaza bi ayra ca dayêne Zazakî zî. Semedo ke Azîz Elaldı serekîya Amedsporî caverdayo Amedspor êdî ca nêdano Zazakî.

Yew xebitnayoxê medya sosyale vano: Kurdî mekerê xwu vîr ra! Kurdî ji bîr nekin! Amedspor 13 rojî yo ke Kurmancî çîke nêvbato. La ge-ge bi Kurmanckî çîke pare keno. Bê pîrozkerdişê serra newîye qet Zazakî yew çîke nêvato Amedspor. Çira?

Tena no şîrove ney zaf şîrovejê bînî estê ke ez nêwazena zaf derg bikî.

Ez peynî de nê waştişê xo vajî; Gere cayo ke tede ca dîyeno kurmankî uca de ca bidîyo Zazakî zî cayo sey Dîyarbekirî de….

Amedspor Zazaki