Enwer Yillmaz

Teqrîben panc serrî verê cû Dîyanetê Tirkîya camîyan de heqê germkerdişê camîyan birna û no wazîfe da cimatê camîyan.  Badê nê bîyayîşî, bi taybetî cayê ke hetê ekonomî ra mîyanê tengî de yê de yê, nêeşkayê heqê germkerdişî bidê û nika camîyanê serdinan de şinê nimajê terawihî kene.  Germkerdişê camîyan nika bîyo problemêko pîl û camîyî zimistan serdin ê. Dîyanetê Tirkîya mîyanê keyf û weşî de cuyeno, cimatê camîyan serd de nimaj keno!

Dîyarbekir de cayanê sey Sur, Şehîtlix û Baxlarî ke şarê xo feqîr o, seba ke camîyan de sistemê germkerdişî nêxibtyeno, mecbur maneno ke zimistan ibadetê xo mîyanê camîyanê serdinan de biko. Aşma Remazanî de şaro ke badê fitarî şino nimajê terawîhî, camîyanê serdinan de ibadet keno çi heyf ke. No hal bêedaletîyêka gird a.

Çi heyf ke, taxanê feqîran yê Dîyarbekirî de, cimeatê camîyan na aşma bimbareke de, semedo ke Dîyanet heqê germbîyayîşî nêdano, mecbur maneno ke camîyanê serdinan de nimaj biko.

Camîyanê ke nêeşkenê heqê germkerdişî bidê de, cimeat nimacê terawîhî serd mîyan de keno. Çi heyf ke no problem safî nêbîyo, halbukî butçeyê Serekîya Karê Dîyanetî zaf pîl o.

Butçeyo ke Serekîya Karê Dîyanetî semedê 2025î waşto 130.1 milyar TL yo. Serra 2024î de no reqem 91.8 milyar TL bi. Dîyanet hende pere gêno dewlete ra la semedê germkerdişê camîyan pere nêdano camîyan û vano, wa cimeat kîsê xo ra bido.  

Mudîrê Dîyanetî bi erebeyanê luxî seyahet kenê, otelanê panc-estareyan de kombîyayîşan kenê, labelê cimeatê camîyan bi recifyayîş ibadet keno!

Cimeatî ra yeno vatiş ke, heqê germkerdişê camîyan, mîyanê xo de arê bidene!. La seke ma zanê, şarê Dîyarbekirî nêmeyê xo  ra zêde bi ucretê asgarî debara xo bikê. Xora ayê ke zaf şinê camîyan zafê xo teqawût ê. Xora ma halê teqawûtan zanê. Teqawûtî hema nêeşkenê keyeyanê xo de xo bikerê germin, senî camîyan bikê germin?

Serekîya Karê Dîyanetî ke aşma Remazanî de en zêde qalê edaletî, heqanîyet û seypeyîye keno, bi x ona bêedeletî keno. Yew dezgeyo ke butçeyê dewlete ra milyaran pereyan gêno çira heqê germkerdişê camîyan nêdano?

Ganî cimeat nê, Dîyanet ke para pîle ya butçeyî gêno nê camîyan rê wayîr vejîyo.