Çolîg de waştişê dewijan ser nameyê Zazakî yê dewe peyser dîyeno dewe. Muxdarê dewa Xezîkî (Kuruca) Ahmet Demîrî va, ma zaf keyfweşê ke nameyê dewe yo bi Zazakî peyser panîyeno ci.
Teklîfê vurnayîşê nameyê dewa Kuruca Meclîsê Beledîyeya Çolîgî de de hetê endamanê meclîsî de ame qebulkerdiş. Eke wînî bo nameyê dewe o bi Zazakî "Xezîk" peyser bidîyo dewe.
Keyepelê Artı Gerçek ra goreyê xebera Mazlum Bucuka ra, muxdarê dewe Ahmet Demirî, semedo ke wa nameyê dewe o bi Zazakî peyser bidîyo dewe muracat kerd.
Muracatê ey hetê meclîsê Beledîye ra qebûl bîyo û eke bi resmî zî qebûl bibo nameyê dewe do bi resmî zî bibo Xezîk. Muxdarê dewe vano ke, " Ma 85 serrî verê cû na dewe de ca bîyê. Ê wextî ra nata nameyê dewe Xezîk o. Nameyê dewe kerdê Kuruca labelê şar ê nameyî nêvano. Derdor de zî ma de zî nameyê dewe Xezîk o. "
