Serekkomarê Tirkîya Recep Tayyîp Erdogan derheqê silamdayîşê Devlet Bahçelî yê parlamenteranê DEM Partî de va: "Ma qîymet danê vatişanê Devlet Bahçelî û hêvî kenê ke destê Tifaqa Cumhurî hetê muhataban ra baş bêro famkerdiş."
Serekkomarê Tirkîya û Serekê Pêroyî yê AK Partî Recep Tayyîp Erdoganî ewro kombîyayîşê partîya xo de derheqê meselayanê Tirkîya de qisey kerd.
Seke yeno zanayîş Bahçelî destpêkê na aşme de, wexto ke Kombîyayîşê Pêroyî yê Parlamentoyî ra vejîya, şîbî hetê rêzanê DEM Partî.
Bahçelî destê xo dabi Hemserekê DEM Partî Tuncer Bakirhan û silam dabi ey.
Recep Tayyîp Erdogan zî derheqê na mesela de qisey kerd û va:
"Ma wazenê ke serranê neweyan ê qanûnî de qiseykerdişêko cîya sîyaset de bivînê.
Ma bawer kenê ke hewceyîya ma bi yewbînfamkerdişêko zêdeyêr esta. Ma seba miletê xo ra dîyalogan ra nêremenê.
Ez vatişanê serekê Pêroyî yê MHP'yî rêzdar Bahçelî bi nameyê biratîya 85 mîlyon merdimê ma zaf manîdar vînena.
Ez hêvî kena ke destê Tifaqê Cumhurî hetê muhataban ra zî baş bêro famkerdiş."
Erdoganî ra mesajê dîyalogî da DEM Partî
Erdogan derheqê nermîya DEM Partî de zî va, goreyê rewşa newîye ya herême hewceyîya înan bi qiseykerdişê zêde û yewbînfamkerdişê zêde esta.
Erdoganî wina va:
"Ê kesî ke her vatişê xo de vanê ma partîya Tirkîya yê, her firsend de îddîaya Tirkîyayîbîyayîşî anê ziwan, ganî goreyê vatişanê xo hereket bikerê. Ganî heme hetî bawer bikerê ke cayê şiddet û terorî sîyasetê demokratîk de çin o. Eke destê to de çek bibo, sîyaset nêno kerdiş. Ti nêeşkenî şiddetî sey metodêk destvistişanê heqan bixebitnî û sîyasetî bikerî. Ma wazenê ke demê neweyî yê parlamentoyî de warê sîyasî de helwest û vatişê cîyayan bivînê. Goreyê rewşa ke herêma ma tede ya, hewceyîya ma bi qiseykerdişê zêde û yewbînfamkerdişê zêde esta.
