Goreyê Medya Tirkîya, Waştişê DEM Partî yo ke bi Abdullah Ocalanî dir bêro têhet qebul bîîyo. Goreyê texmîyan ewro yan meşte yew heyet do şêro Îmralî.
Rojnameyê Sabahî yo ke nêzdîyê îqtîdarî yo, ewro da zanayîş ke waştişê DEM Partî yo ke şêro Îmralî û Rayberê PKKyî Abdullah Ocalanî bivîno ame qebulkerdiş.
Xebere de ame vatiş ke no heyetê DEM Partî yo ke do şêro Îmralî, tede Hetkarê Serekê Parlamentoya Tirkîya Sirri Sureyya Onder û Parlamentera DEM Partî ya Wanî Pervîn Buldanî ra yena pê.
Sabahî îdîa kerd ke pêdîyayîşê DEM Partî û Ocalanî do ewro yan meşte bibo.
Se Bibî?
Serekê MHPyî Devlet Bahçelî 22yê Teşrîna Verêne ya emser kombîyayîşê grûba partîya xo ya Parlamentoya Tirkîya de vatbi ke ganî Ocalan PKK ra biwazo çekan ronê û dima Recep Tayyîp Erdoganî zî paştgirî dabî vatişanê Bahçelî.
Eynî wext de Bahçelî dabî zanayîş ke ganî DEM Partî û Ocalan pêvînayîş bikerê labelê heta nika wextê pêvînayîşî bi hawayêko resmî nêame eşkerakerdiş.
Derheqê vengdayîşê Bahçelî de, Hemserekê DEM Partî Tuncer Bakirhanî kombîyayîşê grûba partîya xo ya parlamentoyî de vatbî ke ey Hemsereka DEM Partî Tulay Hatimogullarî dir waşto ke şêrê Îmralî û beşdarê prosesê aştî bibê.
Dima ra DEM Partî seba pêdîyayîşê bi Ocalanî dir yew waştişname pêşkêşê Wezaretê Dadî yê Tirkîya kerd.
Wezîrê Dadî yê Tirkîya Yilmaz Tunçî dbeyanatê xo yê tewr peyêne de mesela ser o dabî zanayîş ke ê waştişname nirxnenê û vatbî, beno ke pêdîyayîş qedîyayîşê munaqeşeyanê butçeya serra 2025î ra dima bêro kerdiş.
