Wezîrê Pawitişî yê Îsraîlî Yisrael Katzî aşkere kerd ke, înan vera Îranî dest bi hêrişêk kerdo
Vajîyeno ke Fermandarê Pêroyî yê Supaya Pasdaran Husên Selamî amo kiştiş.
Serewezîrê Îsraîlî Benjamin Netanyahuyî aşkere kerd ke înan bi operasyono bi nameyê “Şêro ke Werzeno ra” merkezanê programê zengînkerdişê nukleerî yê Îranî ser hêriş kerdo.
Netanyahuyî da zanayîş ke hedefê înan tesîso sereke yo zengînkerdişî yê Natanzî yo û va, “Hetanî ke no talûke mîyan ra werzo, hêrişî do dewam bikerê.”
Hêzanê Pawitişî yê Îsraîlî (IDF) aşkere kerd ke înan dest bi “hêrişêko nizamî û koordîneyî” vera programê nukleerî yê Îranî kerdo.
Ame vatiş ke bi desan teyarê cengî tewrê operasyonî bîyê.
Fermandarê Îranî yê ke hêrişê Îsraîlî de ameyî kiştene:
"Fermandarê Pêroyî yê Supaya Pasdaran Husên Selamî, Fermandarê Baregehê Merkezî yê Xatemul Enbîya Xulam Elî Reşîd, Serekê Unîversîteya Azad Mihemed Mehdî Tehrançî, Serekê verênî yê Rêxistina Enerjîya Atomî ya Îranî Fereydûn Ebasî."
Eşkerayîya Îranî
Televîzyonê dewleta Îranî va ke xeylêk herêman de, bi taybetî paytext Tehran de, hedefê leşkerî ameyê bombebaran kerdene.
Ame vatiş ke tesîso nukleerî yo Natanzî ameyo hedefgirewtene la qet yew zirar çinî bîyo.
Medyaya Îranî va ke Fermandarê Pêroyî yê Supaya Pasdaran Husên Selamî û Serekê verênî yê Rêxistina Enerjîya Atomî Fereydûn Ebasî ameyê kiştiş.
vajîya Serekê Erkanê Pêroyî yê Îranî Mihemed Baqirî zî hêriş de ameyo kiştene.
Eşkerayîya Amerîka
Wezîrê Karanê Teberî yê Amerîka Marco Rubioyî va ke ê tewrê hêrişî nêbîyê û va:
“Îsraîlî na game seba pawitişê xo eşte.” Rubioyî Îran hişyar kerd û ard ziwan, “Ganî menfeetan yan zî personelanê Amerîka hedef nêgêrê.”
Vervatoxê ordîyê Îsraîlî:
Vervatoxê ordîyê Îsraîlî va ke saetanê vîyarteyan de Îranî 100 dronî hetê Îsraîlî ser o eştê û ê hewl danê ke înan bîyarê war.
Avichay Adraeeyî Xî ser o derheqê hêrişan de eşkerayîyêke vila kerde.
Avichay Adraeeyî va:
“Çend saetanê peyênan de Îranî 100î ra zêde dronî hetê Îsraîlî ser o şirawitê û pêro sîstemê pawitişî xebitîyenê ke înan bifînê war.”
