ZAZAKÎ NEWS - Sereka Şaredarîya Los Angelesî eşkera kerd ke, sûke de qedexeyê vejayîşê teberî ameyo îlankerdiş.
Karen Basse da zanayîş ke şaristanê Los Angelesî yê eyaletê Kalîfornîya yê Amerîka de, semedê hedîseyanê ke protestoyanê paştîdayîşê koçberan de vejîyayê, qedexeyê vejayîşê teberî ameyo îlankerdiş.
Ame vatene ke qedexe do goreyê wextê herêmî yê Los Angelesî saete 20:00 de dest pê bikero û hetanî 06:00 dewam bikero.
Unca zî ame vatene ke no qerar do dormeyê merkezê sûke de, yew qadê 2 kîlometreyî de zî derbazdar bo.
"Na herême ra dûrî vinderê"
Karen Basse, eşkerayîya xo ya ke hesabê xo yê medya komelkî (sosyal medya) ser o kerde, tede îfade kerd ke kesê ke qedexe îxlal bikerê (binpay bikerê) do bêrê tepiştene û wina va:
"Ez halo ke merkezê sûka Los Angelesî de yo, nezdi ra teqîb kena û hazir a ke ma tedbîranê neweyan bigêrîme, seba ke komelanê (cimatê) xo bipawîme.
Protestoyê Los Angelesî
Los Angeles de tepiştişê koçberan o ke hetê Dayîreya Koçberî û Kontrolê Gumrukî (ICE) ra ame kerdene, ame protestokerdene la îdareyê Trumpî vera xoverdayoxan de reaksîyon nîşan da.
Protestoyan de xeylêk kesî ameyî tepiştene, dem bi dem mîyanê hêzanê asayîşî û xoverdayoxan de pêrodayîşî vejîyayî û xeylêk wesayîtî ameyî veşnayene.
Serekê Amerîka Donald Trumpî, pîlbîyayîşê têmîyanbîyayîşî ra dima, teqrîben 2 hezar Pawitoxê Neteweyî şirawitî herême, dima zî aşkere kerd ke 2 hezar pawitoxê bînî û 700 leşkerê deryayî yê peyayan zî ameyê şirawitene.
