Sîyasetkara Kurde Leyla Zanaye va, "Ez wazena Kek Mesûd hemê rêxistinanê Kurdan sey gede û birayê xo bivîno."
Newroza Girde ewro Amed de yena pîrozkerdiş û şar meydanê Newroze de yo.
Adirê verên yê Newroza emserî 12ê Adare de qezaya Licê ya Amedî de ame wekerdiş û pîrozîyan heta ewro dewam kerd.
Ewro zî dorê Newroza Girde ya Amedî, Parka Newroze de yena viraştene.
Sîyasetkara Kurde Leyla Zana Rûdawî rê qisey kerd.
Leyla Zana îfade kerd ke Nêçîrvan Barzanî no proses de rolêko muhîm girewto û wina va:
"Bawerîya mi şarê ma rê esta.
Demo ke Kurdî yewbînî ra aciz benê ez heminanê înan ra aciz bena. Kurdî ewro yewbînî ra nêzdî yê.
Rêzdar Nêçîrvan Barzanî zaf paştî dayo nê prosesî, ez ey rê sipas kena.
Zere de zafrengî û zafvengî, teber de yewrengî û yewvengî.
Şar yew o, reqabetêka rêxistinî esta. Ewro roja reqabetî nîya.
Serekkomarê Tirkîya çîyê zehmetî peynîya xo de verdayî, rayîrêko zehmet akerd. Rayîro pîroz rayîrê aştîye yo. Ez ey rê vana, 'No rayîr bi lez akere.'
"Rêzdar Nêçîrvan Barzanî zaf paştî dayo nê prosesi, ez ey rê sipas kena"
Waştişê mi o yo ke Kek Mesûd hemê rêxistinanê Kurdan sey doman û birayê xo bivîno, rolê ey gird o.
Ê cangorîyan xo seba ewroyî feda kerd, ma înan û dayîk û pîyanê înan rê deyndar ê.
Kurdî tim aştîwaz ê, tenya xo pawenê. Demo ke ti hakêk hêlîna milçikêk ra vecenî a do bikewwo peye to.
Medyaya Kurdkî reya verêne ziwanêko viraştox xebitnena.
Ma hemê bindestinan rê bîyê hêvî.
Kurdistan keyeyê ma hemîne yo.
Dawaya Kurdistanî de şexs qijekî yê, nameyî ne muhîm ê. O ke muhîm o dawaya Kurdistanî ya.
Ez Newroza Rêzdar Mesûd Barzanî, Nêçîrvan Barzanî û Bafil Talebanî pîroz kena.
