Ewro Amed de bi beşdarîya hezaran kesan Amed de Newroze yena pîrozkerdiş.
Şaro ke seba beşdarbîyayîşê Newroza Amedî, saetanê serê sibayî de kewt rayîr.
Roşanê Newroze ya Amedî bi organîzatorîya Partîya Herêmanê Demokratîkan (DBP), Hereketê Cinîyan ê Azadan (TJA) û Partîya Seypêyîye û Demokrasî ya Şaran (DEM Partî) yena pîrozkerdiş. Pîrozîye, Parka Newrozîeya qezaya Rezanî de yena viraştene.
7 serrî ra heta 70 serrî welatîyî bi kincanê xo yê neteweyî verê xo dayê meydanê Newroze.
Cayê pîrozîye ke çimê hemê kesan ey ser o yo, emser zî eynî yo. Pîrozîye, Parka Newroze ya qezaya Rezanî de yena viraştene. Amadekarîyê pîrozîye bi rojan ver dest pêkerdbi. Sahneya betonî ya verêne ame xirabkerdiş û cayê aye de platformêka girde ame viraştene.
Heto bîn ra semedê bi sedan mêmanê ke tebere welatî ra ameyê dawetkerdiş zî platformê protokolî ame viraştene.
Resmêko pîl yê Kemal Kurkutî yo ke Newroza serra 2017î ya Amed de amebi qetilkerdiş zî meydan de ame aleqnayîş.
Pîrozkerdişê Newroze ya emserî ya Amedî de zaf welatan ra zaf kesî ameyî dawetkerdiş. Fransa ra heta Katalonya, Spanya, Îrlanda, Belçîka, Almanya, Îtalya, Kenya, Çekya, Hindistan, Misir, Îran, Lubnan, Îraq, Lîbya, Tunus û Herêma Kurdistanî ra bi seyan sîyasetmedarî, sendîkavanî, nûnerê rêxistinanê komelê sivîlî û rojnamegerî seba pîrozîye ameyî dawetkerdiş.
Emser welat û teberê welatî ra 629 rojamegerî seba teqîpkerdişê Newroze akredîte bîyî.
Pîrozîye do bi rêzgirotişî dest pêbikero. Dima ra zî do şar bêro silamkerdiş. Dima ra zî goreyê dore do Mehmet Kamaç, aktîvîsta TJAyî Sebahat Tuncel, avukatanê Buroya Hiqûqî ya Asrinî ra Özgür Faîk Erol, Hemsereka Pêroyî ya DBPyî Çîğdem Kılıçgün Uçar û Hemserekê Pêroyî yê DEM Partî Tuncer Bakırhan qisey bikerê.
Eyni wext de do Kemençe, Arhat, Grup Avna, Ayfer Duzdaş û Rewşan Çelîker şorê sahne û deyîran vajê.
