Komela Rojnamegeranê Cinîyan a Mezopotamya (MKG) û Komela Rojnamegeran a Dîcle-Firatî yew beyanatê muşterekî de rewşê çapemenîya azade û rojnamegeranê girewteyî ard rojev.
Beyanatê komela rojnamgeran ê cinîyan wîna yo:
Wextê peyênî de di rojnamegerî Nazim Daştan û Cîhan Bîlgîn hêrişê SÎHAyan ra amey kiştene. Pancês rojnamegerî amey tepiştiş û girewtiş. Nê tepişîyayîşan ra teber zaf keyepelî û hesabê medyaya sosyalî zî amey astengkerdiş.
Tepişîyayîşê peyênî
17ê Çeleyî de rojnamegerî Necla Demîr, Rahîme Karvar, Ahmet Guneş, Welat Ekîn, Vedat Orûç û Reyhan Hacioglu amey tepiştiş. 22yê Çeleyî de zî rojnamegere Eylem Babayîgît amey tepiştiş.
Helwesta Komelan
Komelan îfade kerd ke çapemenîye ser o tehda bi hawayêko sîstematîk dewam kena û va: "Yew welatî de ke tede rojnamegerî benê hepsî, merdim nêşkeno qalê azadîya çapemenîye bikero. Ma do tim vajî: Rojnamegerîye suc nîya!"
