Mihemed Kurdî

Seke şima zî zanenê 31ê Adare de Bakurê Kurdistanî de weçînayîşê herêmî/mehelî do bêrê kerdene. Partîyê sîyasî zî bi heme hêza xwu xebatanê xwu rê dewam kenê û seba ke paştîya şarî bigirî tewir bi tewir sozan danê şarî.

Nê wadanê partîyanê sîyasî ra yew zî babete/dehkereya pawitişê ziwanê kurdî yo. Emser Bakurê Kurdistanî de hetê sîyasî ra seba ziwanê Kurdî zaf çalakî amayêne kerdene. Panelan ra bigîre heta mitîngî, kombîyayîşan ra bigîre heta ahengî, meş ra bigîre heta daxuyanîyê çapenî û tewir bi tewir çalakî amayene kerdene.

Nûner û endamê partîyanê sîyasîyan seba ziwanê kurdî bi cilanê xwu yê neteweyî vejîyay meydanan û bi dirûşme û vateyê Kurdî vengê xwu berz kenê. Zafaneyê hetê Kurdî yê sîyasî nê çalakiyan de bal antêne ser muhîmîya ziwanê dayike ser o û vatêne ganî ziwanê kurdî bibo ziwanê fermî yê dewletê û ganî wendegeha despêkî de heta zanîngehê bibo ziwanê perwerdeyê.

Raşta ci ma bi nê çalakiyan zaf zerrîweş bîyê û ma paştî danê çalakîyanê bi nê awa yî.

Gelo Çalakîyê Ziwanî Çi ra Emserr Hende Zaf Bî 

Sedema yewin ya zafbîyayişê nê çalakiyê ziwanî weçînayîş o. Seke ma sere de zî vatbi, 31ê adere de do weçînayîşê herêmî /mehelî bêro kerdene, ena ray partîyê sîyasî seba ke nê weçînayîşî de serkewta bibê û rayê/vengê vîjnayoxan bi dest bifînê nê çalakiyan bidarfînenê. Zaf îdarekar û endamê kurd ê nê partîyan est ê ke înan bi xwu zî ziwanê xwu nêzanê, zaf parlementer û namzedê înan yên kurd est ê ke tûtanê xwu reyde bi tirkî qisey kenê û ciwîyayişê înan zî tirkî yo. Rasta ci eke xemê înan ziwan o, çi ra înan bi xwu ziwanê xwu nêzanê û tutanê xwu reyde tirkî qisey kenê?

Çîyê ke merdim bi xwu nêkero û vajo şarî şima bikerê, eno çiqas rast o? Raşta ci eke xema şima ziwan o, ganî şima tena wexto waçînayîşan ney her tim seba ziwanê kurdî çalakîyan virazê û wayîrê ziwanê xwu vejîyê. Bi rastî zî eke xema şima ziwan o, ganî vernî de şima mîyanê partîya xwû û mîyanê keyeyên xwu de bi kurdî qisey bikerê, dima şarî ra vajê. O çax ma zî do bi şima yeqîn bikerê û palpiştîya şima bikerê.

Rasta ci tena partîyê kurdî ney, qandê coy partîyên tirkî zî xebatanê xwu yê Kurdistanî de qala heq û ziwanê kurdî kenê. Reyna zafaneyî nê partîyan bi deyîrê kurdî reyde xebatanê xwu dewam kenê. La eynî partî û endamê înan gama ke parlementerê kurd parlemento de bi kurdî qisey kenê, vengê ey/aye birenê û vanê ke tîya parlementoya tirkiya yo, ziwanê êta zî tirkî yo, ziwanê kurdî sey Ziwanêko ke nîno şinasnayîş ameyêne qeydkerdene. Ancî gama parlementerê kurd seba ke ziwanê kurdî bibo ziwanê fermî pêşnîyaz danê parlamentoyî, pêşnîyaz bi vengê endamanê enê partîyan red benê.

Êta de ganî şarê ma nê diritîya înan bivîno û çi rey bi înan yeqîn nêkero, çike ke meqsedê înan şar û ziwanê ma nîyo, meqsedê înan tena oyo ke şarê ma bixapînê û rayê/vengê înan bigîrê.

Hemserekê pêroyî HDP'yî yê verên Selahedîn Demîrtaş zî kurdêko Zaza yo û heme leteyanê Kurdistanî de yeno şinasnayîş û heskerdiş. Her çendî ke Selahedîn Demîrtaş nika seba şar û welatê xwu ameyo hepis kerdiş zî la çi heyfo ke hetê ziwanê xwu yê dayîkê ra kemaneyê ci zaf est ê. Sey şima zî zanenê birêz Demîrtaş zindan de çend heb/tenê helbest û pirtûkî nuştî la nê helbest û pirtûkî pêro bi ziwanê tirkî nuştî. Reyna ge ge ma medya ser o vînenê ke famîlya, cînî û tûtanê xwu reyde bi tirkî qise keno, beno ke /belkî maye ey tirkî hol nêzana û tutanê ey zî zazakî hol nêzanê. Eke wina bo gengaz/mimkun nîyo ke Dapîre û torin yewbînan ra baş fam bikerê. Eke birêz Demîrtaş berhemên xwu bi ziwanê xwu (Kurdî) binuso û famîlya xwu reyde zî bi ziwanê xwu qise bikero, o çax do seba şarê kurd zî bibo nimûneyêko zaf pîl, çike tesîrê birêz Demîrtaşî zî şarê Kurd ser o zaf est o. Coka zî ma veng danê birêz Demîrtaşî ke seba nê babetê/dehkereya muhîm peywirê/wezîfeyê xwu baş bi ca bîyaro. Raşta ci ma bi birêz Demîrtaşî zaf bi hêvî yê, seba aye zî waştîşê ma oy e ke ey zî do vêngê ma bi eşnawê û wayîrê ziwanê xwu bivejo.

Bi rastî zî tesîra siyasetî şar û ziwanê ma ser o zaf est o, şarê kurd şarêko polîtîk o. Şarê ma semedê merc û şertanê welatê xwu her tim mîyanê sîyasetî de mendo. Coka ganî baş bizanê heta ke ziwanê kurdî bakurê Kurdistanî de nêbo ziwanê sîyasetî, yanê heta ke partîyên kurd sîyaseta xwu bi ziwanê xwu (kurdî) nêkerê asîmîleya ziwanî ma ser o do bi heme hêza xwu dewam bikero. Aye semed ra ma veng danê heme partî û hetên sîyasî yê kurdî ke sîyaseta xwu bi ziwanê xwu bikerê û ziwanê kurdî xwu rê bikerê xeta sûre.

24.03.2024 / Mêrdîn

E-meîl: [email protected]