Enwer Yılmaz
Ez ge-ge xo bi xo tay çîyanê kilma nusena. Ez înanhesabanê xo yê medya sosyale de vila kena. Xora bi ziwanê ma çi bêro merdimî vîr merdim binuso baş o.
Ez zî wîna kena. Ez wazena înan şima dir pare bikî.
1-Ez çend serrî verî Îstanbul de bîya mêmanê çend şinasîyan. Keye de çend kesê bînî zî estbî. Karê înan dizdî bi. Yewî pers ker va, ti zî diz î? Mi va ney ez dizd nîya. Va, ti esrar roşenî? Mi va, ney ez nê çîyan nêkena. Va, çi îşê to esto tîya de? Mi va, haydê xatirê şima...
2-Ez ewnîyena derdorê xora ke her kes çîyêk weno. Seke bi serrano veyşan ê. Wenê labelê onca mird nêbenê. Ez vera înan şermîyena. Kena nêkena çîke mi qirike ra nêşino war. Ez pê înan şaş manena. Nê kesî çi ça ra ameyê? Ez çira nika mîyanê înan de ya?
3-Senî ke ez bufe ra kewta zerre ti uca de bîya. Xeyalê bi serran amebi ca. Çi gamêka tarîxî û şahane! La to xo kerd raşt û ti şîya. Ney... Gere mi o raştameyîşê ma qeyd bikerdêne. Mi yew colaya serdine şimit, tenekeyo veng ard keye. Nika ez wenîyena ci ra. Seke ewnîyena to ra
4-Belkî mi çend vateyê weşî bivatêne rîyê înan tay bihuyayêne. Raştîyê ke mi vatî weşê înan nêşibî xora. Xemê mi de nêbi tabî. Qêmetê tîza herî înan ra zaf a nika çimê mi de. Xora mi nêwaştêne wa mi ra hes bikerê û bi ê rîyê xo yê bêrûçikî mi rê bihuyê û qisey bikê.
5-Rîyê înan manenê rîyê xozan. Zerrîya înan bibî sey jehrê marî. Qiseyê înan sey vengê cinawiran bî. Ez se ra şîyêne rîyê înan... Rîyê înan o dirî, bêri mi çiman ver o bi tim.
6-Va, ez hamnanî ra hes nêkena Mi va, qey? Va, zimistan çekêtê mi estê. Heme zî bi qalîte yê. Ez eşkayêne pê înan fors bikera. La nika! Nika ma pêrûne ser o tîşortî estê. Pê tîşortan fors nêbeno. Mi va, ti zî çekêtanê xo xora bide onca. Naye ser ma êdî çîke nêvat..
7-Ma dewe de ronişte bî. Verê ma ra yew hero qer vîyart. Mi va, tay însanan ra bêzerar o no her Ey va, her her o, heta şan zireno, çereno, şimeno, fişqî keno... Mi va, sankî ti çîyêko bîn kenî!
8-Ewro ma veyveyan ser o qisey kerd Gelo veyve hamnan weş o yan zimistan? Ey va hamnan weş o mi va zimistan Va, hamnan serê hewzan de virazenê merdim pê honik beno Mi va zimistan salonan de virazenê merdim zere de germin beno Mi fehm kerd ke krîterê ma goreyê dereceyê hewayî yo
9-Ez zehf kuna merdimanê dinyanedîyan ver. Çimkî ez nêşkena înan ser o analîzêk bikî. Belkî ez eşkena derheqê her grûbe de çîkêk vajî la wexto ke mewzû bena merdimanê dinyanedîyan, fekê mi gêrîyeno. Ma qij bî pîlê ma tim ma rê vatêne, "îna meke, sey dinyanedîyan meke"
