ZAZAKÎ NEWS - Hekarê Serekkomarê Tirkîya Cevdet Yilmazî da zanayîş ke ê wazenê Sûrîyeya neweye de temsîlîyetê kurdan zî bibo.
Vizêr Kombîyayîşê Pêroyîî yê Parlamentoya Tirkîya de butçeya Serekomarîya Tirkîya ya 2025î ser o munaqeşe bi.
Ardimkarê Serekkomarê Tirkîya Cevdet Yilmazo ke bi xo zî kurd-zaza yo, kombîyayîş de ca girewt.
Parlamenterê DEM Partî yê Rihayî Ferît Şenyaşarî kombîyayîş de Cevdet Yilmazî ra persa ke helwestê înan vera Kobanî û kurdê ke Sûrîye de çi yo? Kerd.
Cevdet Yilmazî îzah kerd ke ê wazenê Sûrîyeya neweye de temsîlîyetê kurdan bibo.
"Kurdê Sûrîye unsurê eslî yê"
Yilmazî îzah kerd ke ê kurdan û PKKyî yewbînan ra cîya vînenê û îdîa kerd ke PKK uca de zordarîya şarî keno û wina dewam kerd:
"Kurdê ke Sûrîye de yê, şar û unsurê eslî yê ê welatî û ê erdnîgarî yê.
Ma wazenê Sûrîyeya neweye ya ke do bêro awankerdiş de, bi hawayêko ke heqê înan o temsîlîyetê kurdan bibo, azadî û heqê xo yê bingeyênî bi hawayêko tewr baş biciwîyê û mîyanê aramîye de bibê.
Ê zî birayê ma yê, merdimê kurdanê welatê ma yê. Coka yew nêzîkbîyayîşê ma yo cîya vera înan çin o.
Labelê zereyê Tirkîya de û teber ra ma do xebata xo ya vera terorî bi hawayêko tewr baş dewam bikerî."
