ZAZAKÎ NEWS - Goreyê raporê CHPyî yo ke derheqê qeyûman de amade kerdo, 8 serranê peyênan de Tirkîya û Vakurê Kurdîstanî de hukmatî yanî îqtîdarê AK Partî 154 rey qeyûm şawito îdareyê mehellîyan ser.
Komîsyonê Weçînayîş û Huqûqî yê CHPyî derheqê qeyûman de yew rapor vila kerd.
Dîyarbekir veren o
Goreyê raporî, 15ê Temmuza 2016î ra dima 8 serranê peyênan de îqtîdarê AK Partî û MHPyî tewr zaf Vakurê Kurdîstanî de qeyûm tayîn kerdo.
Bi 26 tayînkerdişê qeyûmî Dîyarbekir rêza verêne de yo û Wan zî bi 23 tayînkerdişan rêza dîyine de yo.
Rapor de ame dîyarkerdiş ke serran gore bi 60 qeyûman serra 2016î rêza verêne de ya û bi 38 qeyûman zî serra 2019î rêza dîyine de ya.
Verê weçînayîşê 31ê Adarê 2024î 49 şaredarî hetê qeyûman ra ameyêne îdarekerdiş û înan ra tenya 9 şaredarî encamê weçînayîşê 31ê Adarî de nika hetê AK Partî û MHPyî ra yenê îdarekerdiş.
Rapor de sey encam 6 nuqteyî ameyê dîyarkerdiş:
1. Îqtîdar ganî rêz bigîro encamanê ke sindoqan ra vejîyenê.
2. Ganî sîstemê qeyûmî biqedîyo.
3. Proje-qanûno ke 10 partîyê sîyasîyan seba qedînayîşê sîstemê qeyûmî pêşkêşê Parlamentoya Tirkîya kerdo, ganî bibo qanûn.
4. Bi rastkerdiş a Qanûnê Şaredarîya 5393î ganî xalê antî-demokratîkî yê ke rayîr akenê sîstemê qeyûmî rê bêrê wedartişî.
5. Serekê şaredarîyan ê ke derheqê înan de qerarêk nêameyo dayîş la cayê înan de qeyûm ameyo ronayîş wa ageyrê wezîfeyê xo ser.
6. Îqtîdarêk dir ke xalê 2, 5, 123 û 127ê Qanûnê Bingeyênî seba sîstemê qeyûmî şuxulneno, qiseykerdişê ser qanûnêko newe de mumkin nîyo.
