ZAZAKÎ NEWS - Parlamenterê CHPyî Sezgîn Tanrikulu îzah kerd ke Selahattîn Demîrtaşî hişyarîya provokasyonan dayo.
Parlamenterê CHPyî yê Amedî Sezgîn Tanrikulu vizêr Hemserekê veren ê HDPyî Selahattîn Demîrtaş û hemserekê veren ê Şaredarîya Amedî Selçuk Mızraklı zîyaret kerdî.
Sezgîn Tanrikulu îfade kerd ke Demîrtaşî hişyarîya provokasyonan daya û vato ganî her di hetî zî bi lez gaman bierzê ke verê provokasyonan bêro girewtene.
Tanrikulu dima ke Hepîsxaneyê Edîrneyî ra agêra yew beyanat da û îşaret kerd ke, înan "prosesê aştî" ser o qisey kerdo.
"Ganî şar zî nê waştişê aştî rê wayîr vejîyo"
Sezgîn Tanrikulu detayê nê zîyaretî ser nê malumatî dayî:
"Ma derheqê prosese aştî, kngreya PKK ke do semedê çekronayîşî virazo ser qisey kerd û ma zanê ke no do rayîrê demokratîkbîyayîşî û aştîya Tirkîya akero.
Coka, embazê ma îfade kerdî ke ganî şar zî nê waştişê aştî rê wayîr vejîyo.
Eyni wext de, Demîrtaşî fikrê xo mi reyde pare kerdî ke ganî parlamento zî gamanê hemwextan seba bihêzkerdişê nê prosesî bierzo û bi lez hereket bikero.
Ey bi taybetî îşaret bi no çî kerd ke eger no proses bi lez aver nêşêro, do rayîrê xirabîyan û provokasyonan abibo. Coka,ey va ke ganî her kes bi nîyeto baş bixebito ke no proses hîna lez aver şêro û bi lez gamî bêrê eştiş.
Yanî ganî parlamento, hukmat, serekkomar û partîyê mixalefetî bi nîyeto baş bixebitê ke rêxistin bêçek bibo û gamê demokratîkî bêrê eştiş."
