Tirkîya de her çiqas nameyê tay partîyanê serekeyan vejîno ver zî la goreyê malumatanê resmîyan ê serra 2024î 139 partîyê sîyasî awan bîyê û Partîya Demê Demokrasî (DEZA-PAR-Demokrasi Zamanı Partisi) zî înan ra yew a.
DEZA PAR de sîstemê hemserekîye esto û eynî sîstem DEM Partî de zî esto. Labelê hemserekê DEZAR PARî her di zî camêrd ê.
Mîyanê nê partîyan de xususîyetê DEZA-PARî no yo ke reya verêne partîyêk seba ke heqanê Zazayan bipawo bi hawayêko resmî awan bîya.
DEZA-PARî aşma Êlule ya 2024 de zî Kongreya xo ya Îstîsnayî viraşte.
Hetkarê Serekê Pêroyî yê DEZA-PARî Alî Demîrel Vengê Amerîka rê îzah kerd DEZA PAR senî ke heqanê Zazayan paweno heqanê heme şaran zî do bipawo.
Alî Demîrel wîna vano:
"DEZA-PAR zaf astengî û zehmetîyan mîyan ra vîyarto. La ewro verê made zaf xebatî estê. Her çî ra ver ma wazenê ke TRT ZAZAKÎ zî abibo û seba naye ma dest bi kampanyaya îmzeyan kerdo û ma heta peynîya na serre kampanyaya xo rê dewam bikê. Ma wazenê ke Wezaretê Perwerdeyî ziwanê Zazakî zî qebul bikero û seba perwerdeyê Zazakî rayîr akero. Nê xebatî û tay xebatê ma yê bînî do dewam bikerê."
DEZA-PARî kongreya xo ya peyêne 29ê Adare yê 2024 de viraşte û 41 bajaranê Tirkîya de zî dest bi karê rêxistinbîyayîşî kerd. Amancê înan o esasî no yo ke weçînayîşanê 2028î de bi nameyê DEZA-PARî bişêrê weçînayîşî.
Alî Demîrelî wîna dewam kerd:
"Ma qet şarê xo Zaza tena nêvardayo. Ma qet gamêk xetê xo yê sîyasetê demokratîkî ra peyser nêerznenê. Sere de şarê Zaza û heme şaranê bindestan bipawe. Ma tîya ra veng danê şarê Zazayan ke wa wayîrê heqanê xo vejîyê û ziwanê xo û kulturê xo bipawê."
DEZA PAR wazeno ke têkilîyanê xo partîyanê Kurdan reyde xurt bikero. Ê îlan kenê ke berê înan heme partîyanê Kurdan û partîyanê bînan ê aştîwazî rê akerde yo.
Çime: Eyyp Demîr /VOA Kurdkî
