ZAZAKÎ NEWS Serekê Şaredarîya Bajarê Girdî ya Stenbolî Ekrem Îmamoglu bi bahaneyê "bêusulîye û serekê rêxistine terorî" tewqîf bi.
Ekrem Îmamoglu 19ê Adare de amebi tepiştiş.
Îmamoglu semedê dosyaya "bêusulîye" ame girewtiş, dosyaya "teror" zî badê cû amey îlawekerdiş..
Çarçewa tehqîqatê "teror" de Îmamoglu, Serekê Şaredarîya Şîşliyî Resul Emrah Şahan, Hetkarê Sekreterê Pêroyî yê Şaredarîya Bajarê Girdî ya Stenbolî Mahîr Polat û Îdarekarê Enstîtuya Reformî Mehmet Alî Çalişkan bi sûcdarîya "ardimkerdişê rêxistina terorî ya çekdare" bi waştişê teqîfkerdişî erşawîyay edlîye.
Îmamoglu zî tede heta nika derheqê 22 kesan de qerarê tewqîfkerdişî ame dayîş.
Serekê Komîteya Rêberîye ya Şirketa Hempar a Medya ya Şaredarîya Bajarê Girdî ya Stenbolî Murat Ongun û Mudirê Şirketa înşaatî ya Îmamoglu Tuncay Yilmaz zî mîyanê grewtîyan de yê.
Çi bîbi?
Serdozgerîya Komare ya Stenbolî vatbi ke tehqîqat hetê "Buroyê Cigêrayîşanê Sûcanê Rêxistine" ra ameyo akerdiş.
Seba Îmamoglu amebi vatene ke o "serekê rêxistine" yo û amebi îdîakerdiş ke na rêxistine "karsazan ra pereyî arê dayê, bi hawayêko neheq qezenc kerda.”
Derheqê Ekrem Îmamoglu de tehqîqatêko bîn amebi akerdiş.
No tehqîqat de behsê "îtîfaqê bajaran" yê CHP û DEM Partî ameyo kerdiş û vatjîyo ke ey nê rayîrî ra "ardim dayo PKK/KCK" û "sempatîzanê rêxistinre Şaredarîya Bajarê Girdî ya Stenbolî de bi ca kerdê."
