Televîzyonê fermî yê Îranî ewro, 14ê Hezîrane, da zanayîş ke di fermandarê payeberzî yê Heyetê Erkanê Pêroyî yê Hêzanê Çekdaran hêrişê Îsraîlî de ameyê kiştiş.
Goreyê Televîzyonê fermî yê Îranî, kesê ke ameyê kiştiş nê yê:
· Emîd Xulamriza Mîhrabî: Hetkarê Serekê Îstîxbaratî yê Heyetê Erkanê Pêroyî yê Hêzanê Çekdaran.
· Mehdî Rebbanî: Hetkarê Serekê Operasyonan ê Heyetê Erkanê Pêroyî yê Hêzanê Çekdaran.
Mabênê Tehran û Tel Avîvî de pêrodayîş dewam keno û Îsraîlî bi nameyê "Şêro ke Werzeno we" Îran de vera 200î ra zêde hedefanê stratejîkan operasyonêkê hewayî yo hîra viraştbi.
Netîceyê hêrişan de, yew hûmare fermandarê payeberzî yê Ordîyê Îranî û Pasdaran ameyî kiştiş, û goreyê malumatê verênan, zerarêko pîl resayo merkezanê atomîyan ê ê welatî.
Unca zî, medyaya Îranî îfade kerd ke yew hûmare fermandarê bînî yê Ordîyê Pawitoxanê Şorişê Îslamî (Pasdaran) zî ameyê kiştiş, ke mîyanê înan de Serekê Erkanê Pêroyî yê Hêzanê Çekdaran Mihemed Baqirî, Fermandarê Pêroyî yê Pasdaran Husên Selamî û Fermandarê Hêzanê Hewayî yê Pasdaran zî estê.
Goreyê eşkerayîya Balyozê Îranî yê ke Mîlletanê Yewbîyayeyan (UN) de yo, netîceyo pêroyî yê hêrişan de 78 kesî ameyê kiştene û 320 kesê bînî zî birîndar bîyê.
