Mihemed Kurdî

Yew vateyê ma yê verênan est o, vano ke: "Dinya heme duşmenê ma ya, ma zî duşmenê xwu yê."

Eno vateyê verênan ke pîlanê ma verê cû semedê şarê ma vatêne rast o û heta nika zî nêvuryayo, yanê hîna zî duşmenê Kurdan reyna Kurd bi xo yê. Kurdistan de zaf kes û hetî est ê seba ke xwu welatheskerdox nişan bidê galeyê serek û hizb û partîyên binê yên Kurdî kenê, neng û heqaretê giranê ke merdim nêeşkeno duşmenê xwu ra zî vajo înan yewbînan ra vanê.

Eno şer û pirodayîş mîyanê hetgiranê partîyanê Kurdî de hende pîl bîyo ke resayo daraxêko xeternak. Eke şima tenya yew roc platformên dîjîtal yê sey Facebook û Twitterî tamaşe bikerê şima do bivînê ke enê hetgiranê hizban senî yewbînan ra nefret kenê û galeyê yewbînan kenê. Çekûya "Xaîn" fekê înan de nêkeweno, minaqeşeyêko tewrî qij de zî hema yewbînan ra vanê ti xaîn î û nengan çinenê. Gama merdim heqaretê ke înan yewbînan ra vanê, vîneno gonîya merdimî ziwa bena, merdim kurdîtîya xwu ra şermîyeno.

Kam ke xwu ra yew îdeolojî yan zî partî veçintî, tena fikrê înan xwu rê raşt vîneno. Enê merdiman hertim îdeolojîk fikirîyenê, tehemûla Kurdê ke sey înan nêfikirîyenê nêkenê û înan ra vanê ke şima xaîn ê, yanê goreyê înan fikir û îdeolojî û hizbanê binê yên Kurdî pêro çewt ê û tenya yê înan rast o. Bi eno qaydeyê şarê roc bi roc yewbînan ra dûr şinî û yewbînan ra nefret kenê.

Heskerdişa enê îdeolojî û hizban çimê hetgirê înan hende kor kerdo ke êdî înan bi merdeyanê yewbînan şa benê, yanê enê hetan fek duşnenî xwu ra veradayê şerê yewbînan kenê û bi aweyêko eşkere bi binkewtişê yewbînan zerrîweş benê. Yanê enê hetan heskerdişê hizb û partîyên xwu ser heme çîyê ra vênenê.

 Gelo Ma Do Senî Vernîya Enê Şerî Bigirî

 Gelo eke meştî hizb û partîyê Kurdî bibê yew û yewitîya neteweyî awan bikerê, nafa enê kesê ke yewbînan ra hende heqaretê pîl kerdê do senî biewnê riyê yewbînan ra? Aye semed ra hewce nêkeno ke ma yewbînan ra heqaret bikerê û zerrîya yewbînan bişiknê.

Raşta ci seba ke ma bibê welatheskerdox zî hewce nêkeno ke ma duşmenatîya partî û hizbanê binê yên kurdî bikerê, eke ma wina bikerê bêguman ma do tenya zerrîya duşmenî weş bikerê û ma do xizmeta duşmenê xwu bikerê, yanê ma do waştîşê înan pêkbîyarê. Enê şer û pirodayîşên mîyanê ma de do çi havil nêdo şar û welatê ma, xwu ra eke ma şerê yewbînan bikerê, hewceyî bi duşmenan zî nêmaneno, çimkî eke duşmenê merdimî keyeyê ra bo dej û barê merdimî zaf giran beno.

Ganî şarê ma yo erjaye baş bizano ke roca ewroyîne de fikrê partî û hibzî û îdeolojî û mezhebî ma yewbînan ra dûr fînenê. Coka duşmen, duşmenê hizb û îdeolojî û mezheb û partîya şima nîya, duşmen, deşmenê heme Kurdan o. Aye semed ra ganî ma zî fek enê fikranê ke ma yewbînan ra dûr fînenê ra veradî û ma tayn nuqteyên sey welat û ziwanî de pîya bikerê û tena netewî bifikrê û hereket bikerê. Helbet bê fikr û îdeolojî zî nêbeno la heta daraxêko hewcedarîya ma bi yewitîyê est o, an badê ke welatê ma azad bi enê hizb û îdeolojî û partî heme zî dewlemendîyên şar û welatê ma yê, kam kamcîn hizb û îdeolojîyê rê hes keno wa biko serbest o. 

Beno ke îdeolojîya ma, ewnîyayîşê ma, hizb û partîyê ma yewbînan ra cîya bê la se beno wa bibo ganî ma hurmet bidê bawerî û fikrê yewbînan û ma yewbînan ra hes bikerê, çimkî sewbîna yew rayîrê ma çin o. Seba ke ma zî biresê xelsîye ganî doz û dawa ma welat û ziwanê ma bo û ma tewr zaf înan ra hes bikerê.

Senî ke verê cû pergala eşîretîye vernîya yewitîya Kurdan de asteng bi nika zî mezheb, îdeolojî, hizb û partî yewitêya ma Kurdan rê asteng ê. Eke ma ewro vernîya enê şerî mîyanê nêgirê beno ke meştî erey bibo, çimkî eno şer tenya roca ma yê ewroyîn nê eynî wextê de sibaroca şar û welatê ma zî kişeno. Ena ray ra hêvî û waştîşê mi oy o ke hizb, partî û şarê ma vera yewbînan de bi sebir bê û palpiştîyê bidê yewbînan, xwu vîra mekerê eke ma xeyra yewbînan biwazê, bêgûman ma xêyrê bivînê.

25.07.2024 /Mêrdîn 

E-maîl: [email protected]